¡Santos esperteyos!

Esti miércoles cumpliéronse 75 años dende’l nacimientu de Batman, polo que nos EEUU decidieron establecer el 23 de xunetu como’l Batman Day. Precisamente, foi esti superhéroe, el primer xusticieru que faló gallegu, vascu y catalán. Y ye que TVG, ETB y TV3 emitieron a finales de los ochenta la serie que protagonizara Adam West (Batman) y Burt Ward (Robin) nos años sesenta. En Galicia, la serie convirtióse nun símbolu de los primeros años d’emisión y del mallográu doblaxe de los 80. Por eso, foron munches les piticiones que surdieron nos últimos años pa que volviera reponese. Mesmamente, l’asociación A Mesa pola Normalización Lingüística púnxose en contactu en xineru del 2014 con Warner Bross y TVG pa que la edición del DVD de la serie incluyera una pista d’audiu en gallegu. L’asociación tomó esta iniciativa depués de que l’autonómica se negara anteriormente a ceder l’audiu en gallegu d’otres series. Los motivos yeren económicos, pero tamién llingüísticos. Y ye que TVG tien un alcuerdu cola Secretaria Xeneral de Política Llingüística de la Xunta de Galicia pol que se compromete a redoblar tola producción ayena emitida enantes de 1990 por mor de la so baxa calidá y los errores llingüísticos. Con too, A Mesa recordó qu’hubo munchos fans de la serie que-y pidieron que realizara eses xestiones “porque’l doblaxe gallegu ye’l que-yos resultaba más atractivu y familiar”. Mesmamente, "¡Santos morcegos, Batman!", la frase de sorpresa que diz Robin en tolos capítulos ye ún de los símbolos del doblaxe al idioma de Rosalía.

Esta producción de 120 capítulos dio orixe a la batmanía y ye una referencia inevitable de la cultura popular del sieglu XXI. La so estética pop, la fotografía de collores recargaos, el diseñu de vestuaríu, los diálogos estrambóticos, les onomatopeyes impreses na pantalla y el so histrionismu convirtiéronla nuna serie de cultu y nun iconu de la historia del Camp. Trátase d’una corriente artística rellacionada coles formes del arte kitsch, consideráu como una copia inferior y ensin gustu d’estilos que tienen dalgún grau de valor artísticu reconocíu. Suelen identificase les sos cualidaes col humor, la ironía, la desaxeración, la llocura, la vulgaridá, l’artificialidá o’l calter afemináu, dalgo que convierte a munchos elementos d’esta estética n’iconos de la cultura gai. Y ye que Batman llegó a ser protagonista d’estudios académicos nesi sentíu y en 1964 el sicólogu Fredric Wertham publicó Seduction of the innocent, onde diz que Batman y Robin yeren amantes, polo que podíen incitar a los neños a tener fantasíes gais.

Nun sé qué opináis, pero a ver si la Xunta pola y Xega entamen una campaña conxunta pa que TPA emita la serie n’asturianu…