El primer fenómenu social de les televisiones autonómiques (daquella ETB, TV3 y TVG) foi en 1987 cola emisión de la serie británica The Young Ones (Os novos na so versión gallega, Els joves en catalán y Gazteak en vascu) ). Esta producción de BBC emitida orixinalmente ente 1982 y 1985 convirtióse nuna serie de cultu pol so argumentu –cada protagonista representaba una tribu urbana- y los chisgos a la cultura pop, dalgo que fixo que conectara mui bien cola audiencia moza y urbana qu’hasta’l momentu nun sintonizara estes canales.
La serie desenvuélvese nos tiempos de la Inglaterra thatcheriana y fala de cuatro estudiantes peculiares que comparten en Londres un pisu puercu que-y allugaron la un exiliáu rusu. Los mozos son cuatro arquetipos: Neil ye'l hippy, un ser pacíficu y bondosu que s'encarga de les xeres doméstiques; Vyvyan el punk, precisa de la destrucción y de la violencia como del aire qu'alienda; Rick ye l'anarquista, los sos ideales son bien confusos, fala enforma pero actúa pocu y ye un incondicional del cantante Cliff Richard. Mike ye l'únicu que podría pasar por un tipu normal, ye un mood, y el so oxetivu na vida ye nun trabayar. Los cuatro mozos viven en permanente enfrentamientu cola sociedá y col so caseru.
El so humor anárquico y poco convencional ayudó a llevar la comedia alternativa a la televisión a los años 80 y convirtió en nomes conocíos los sos actores y guionistes. Poco depués, el programa emitióse na MTV, convirtiéndose nún de los primeros programes non musicales emitíos nesta cadena. Ye de reseñar que la música tenía muncha importancia na serie, porque en dellos episodios participaben grupos new wave y rock de la dómina. Tamién facíen apaiciones especiales dellos grandes actores británicos. Nel 2004, la serie foi escoyida númberu 31 na votación entamada pola BBC pa escoyer la meyor sitcom del Reinu Uníu.
No hay comentarios.:
Publicar un comentario