Los Bolechas, esti sábadu en TPA

TPA va estrenar esti sábadu a les 9.00 hores Los Bolechas –anque pienso que n’asturianu tendríen que ser Los Bolechos o Los Bolechinos-. El día de la estrena va emitise ente un capítulu de la serie documental Mirasturies y la reposición de Pieces, programes que-yos encanten a los neños, polo que de xuru que toos van dexar de ver a Bob Esponja o a Pepa Pig en Clan y van poner la TPA…

Pel momentu, sabemos que la televisión asturiana dobló los primeros 24 capítulos y que’l domingu van emitir otru episodiu nel mesmu horariu, anque nun sabemos cuántos van programar en cada emisión, polo que nun podemos echar cuentes pa saber les selmanes que va durar la esperiencia…

Otra manera, tamién sabemos yá los nomes que van recibir los personaxes:

·         Xabel Bolechas (Carlos na versión orixinal): Ye l’hermanu mayor (unos 7 años), ye’l responsable y el que, por edá, tien qu’encarar les situaciones más comprometíes, non ensin mieu; ye’l que más rellación tien con Trasgu, el perru de la serie; ye un poquitín fartón y brutu; los sos xuguetes favoritos son los moñecos tipu "Supermúsculos".

·         Cloya Bolechas (Loli): xunto con Pili, la so hermana ximielga, ye la segunda n’edá (unos 6 años); ye mui traste y positiva, anque un puntu frívola; xuega con coches teledirixíos y con moñeques.

·         Olaya Bolechas (Pili): ye igual a la so hermana ximielga, anque un poquitín más seria. Présten-y los oficios consideraos tradicionalmente d’homes: mecánica de automoción, carpintería…

·         Xuacu Bolechas (Braulio): ye’l terceru n’edá (5 años); un poco cobarde, nun quier que lo vean en porricu nin na intimidá; ye’l más cerebral de los hermanos y, por eso, ye despistáu; présten-y los instrumentos de música y los ordenadores, amás d’otros xuguetes de tipu científicu.

·        Lena Bolechas (Sonia): ye la cuarta n’edá (3 años); ye caprichosa y dalgo llinguatera; présta-y andar con coses de muyeres adultes: bolsos, zapatos de tacón, barra de llabios; los sos xuguetes favoritos son los rellacionaos coles peluqueríes y la estética. Xuega con princeses.

·         Tatá Bolechas (l’únicu que conserva’l nome orixinal gallegu): ye’l más pequeñu de la familia (9 meses); tovía nun  fala, nin anda; anque ye seriu y curisosu; siempre col chupu na boca y al llau de Trasgu. 

·         Trasgu (Chispa): ye un perru de raza husky siberiana; anda siempre ente los dueños; la so presencia, anque discreta, faise notar; ye un perru que nun lladra ensin motivu.