SuperÁlvarez

Préstame la noticia de que SuperLópez, ún de los mios personaxes favoritos de cómic dende neñu, va llegar al cine nel 2016. Sicasí, van convertilo nun personaxe de carne y güesu… SuperLópez ye una serie creada en 1973 pol dibuxante español Juan López Fernández, meyor conocíu pol so nomatu de Jan, y que nació p’asonsañar a Superman. Nos primeros álbumes, la serie movíase alredor del mundu de los superhéroes, pero depués Jan fíxose cargu tamién del guión y al traviés del personaxe aprovechó pa tratar toa una serie de temes d'actualidá y, mesmamente, pa facer crítica social.

SuperLópez traducióse al alemán (Super-Meier), danés (Superdan), noruegu (Superegon) y suecu (Super Nilsson). Sicasí, DC Comics, empresa dueña de los derechos de Superman, presionó nel mercáu internacional pa que nun trunfara lo que consideraben un plaxu del de Kriptón. Amás, Jan nunca tuvo muncho interés na publicación fuera del Estáu al nun poder controlar les traducciones –n’Alemaña llegaron a indicar como autor del personaxe a Francisco Ibáñez, padre de Mortadelo y Filemón-.

Con too, SuperLópez sí que foi traducíu al catalán -col nome de Super Llopis- gracies a les subvenciones de la Generalitat de Catalunya. Otra manera, nel 2005 el Comú de Canillo, n’Andorra, encargó y repartió ente los sos habitantes una edición de 1000 exemplares de Les Muntanyes Voladores. Una traducción al catalán del álbum Los montes voladores, anque col nome orixinal del personaxe, SuperLópez. En gallegu, realizóse una edición nel 2010 de La caja de Pandora, traducida como A caixa da Pandora.

L'últimu álbum publicáu en catalán toma como partida unos fechos reales: En xunetu de 1934, un rusu llamáu Borís de Skossyreff autoproclamóse rei d'Andorra. En nueve díes promulgó una constitución, convocó elecciones xenerales y foi destronáu por dos guardias civiles unviaos pol obispu de la Seo de Urgel –co-príncipe d’Andorra-. 

A partir d'esti acontecimientu históricu, Jan creó una de les más imaxinatives aventures de SuperLópez, desenvolviendo l'acción na actualidá y nel Principáu d'Andorra: Boris II pretende convertir Andorra nuna isla volante, llevala al Pacíficu y proclamase Rei. Sicasí, los malvaos nun son los personaxes imaxinarios, sinón un grupu de promotores inmobiliarios que pretenden construir hasta que nun quede nengún espaciu verde nel país.