“Enriba y embaxo”, una serie pa les mañanes de TPA

Upstairs, Downstairs (Enriba y embaxo) ye una serie británica de drama ambientada nuna casona de l'aristocracia de Londres mentes el períodu eduardín, la Primer Guerra Mundial y nel períodu de enteguerres. La serie reflexa la vida de los criaos, que viven nel andar d'embaxo y de los señores - los Bellamy- que viven nel andar d'enriba. Na serie aparecen los grandes eventos de la dómina, como l’afundimientu del Titanic o'l crack del 29, pero tamién muestra'l cambiu gradual na vida cotidiana, pretendiendo ser un documentu de los cambios sociales y tecnolóxicos qu’asocedieron ente 1903 y 1930.

Esta producción emitió 68 capítulos de 50 minutos pela canal británica ITV ente 1971 y 1975. Recibió un premiu Emmy y un Globu d'Oru. Nos años noventa foi una de les ficciones estranxeres de más éxitu nes televisiones autonómiques. Asina, la TVG estrenóla en 1991, pero volvió a emitila nel 2000 y nel 2009, yá na so canal segunda, tvG2. N'agostu de 2010, la BBC empezó a grabar un remake pa competir directamente cola exitosa Downton Abbey. 

Otra manera, nel 2014, TVG estrenó Pazo de Familia, spin-off de la exitosa Libro de Familia -per otru llau, versión a la gallega de Cuéntame cómo paso- y que bebe claramente de la producción británica. Ambientada nuna capital d’una provincia gallega nos años ochenta, mestura tamién la vida d’una poderosa familia cola del serviciu. Mesmamente, les dos series principien cola mesma escena: la sirvienta protagonista llamando a la puerta principal de la casona enantes de que-y recuerdan que tien qu’entrar pela puerta de serviciu. Al igual que na orixinal, el sitiu de caún -enriba o embaxo- marca les rellaciones ente los protagonistes. L'útimu capítulu emitíu, que compitió directamente con series d'éxitu como Isabel o La que se avecina, algamó un 14,6% d'audiencia y 175.000 espectadores.

Viendo l’éxitu de Downton Abbey en tol mundu –la mesma Michelle Obama confesóse fan de la serie-, nun taría mal que TPA recuperara Enriba y embaxo pa la so programación. Emitila con un doblaxe al asturianu y programala nel güecu qu’ocupen les tripiticiones d’El Faro y d’espacios como Medicina.com TV o Date una vuelta de xuru qu’ayudaria a llevantar les audiencies de la cadena –amás de da-y formientu al audiovisual asturianu-.