Cambios de gobiernu y televisiones públiques

País Valencianu

Nel País Valencianu, tolos partíos que formen el Gobiernu nuevu (PSPV, Compromís y Podemos) apoyen la reapertura de Canal 9. Mesmanente, el presidente de la Generalitat, Ximo Puig, quier qu'esta canal vuelva tar nes pantalles el 9 d'ochobre d'anguaño, Día del País Valencianu y cuando se cumplen 26 años de la primer emisión de Canal 9. Per otru llau, los ex-trabayadores úfrense pa empezar a emitir en tres meses.

Isles Baleares

La Conseyera de Cultura nueva, Esperança Camps -periodista y ex-trabayadora de Canal 9-, anunció namás xurar el so cargu qu'una de les sos primeres midíes va ser qu'IB3 recupere'l modelu llingüísticu qu'afala la Universidá de les Isles y que s'usó nes emisiones nos primeros nueve años. Mentanto, la xefa de llingüístes de la canal, Maria Antònia Lladó, colocada a deu pol PP y casada con un miembru de Ciudadanos, dexaba'l so cargu. Esta situación surdió depués d'imponer un modelu llingüísticu ensin base científica qu'afuxía de les semeyances col catalán y que denunciaron los trabayadores de la canal.

Países Catalanes

El mesmu Ximo Puig asegura que va trabayar pa la reciprocidá d'emisiones ente TV3 y Canal 9 y Camps fala de texer pontes ente les tres autonomíes de fala catalana. Otra manera, el presidente de la Corporació Catalana de Mitjans Audiovisuals (CCMA), Brauli Duart, acaba de proponer la creación d'un consorciu ente TV3, Canal 9 y IB3. L'oxetivu ye la producción de programes y informativos conxuntos. Parez que dende Valencia ven bien l'alcuerdu.

Navarra

L'alcuerdu ente Geroa Bai, Bildu, Podemos y IU, que va facer qu'Uxue Barkos -ex-trabayadora d'ETB- sía la primer presidenta abertzale de Navarra, inclúi ente les sos propuestes principales afalar l'alcuerdu yá aprobáu pol Parllamentu autonómicu pa qu'ETB pue recibise nes cases de los navarros. Del mesmu mou, Barkos afirmó que va collaborar col País Vascu “non como fixo hasta agora UPN, que punxo escayos pa la emisión d'ETB y de los medios que trabayen en vascu. Vamos dar respuesta a too eso con normalidá”.

Aragón

Ún de los principales problemes pa llegar a un alcuerdu d'investidura ente PSOE y Podemos foi la situación de la televisión pública. A la fin, los segundos consiguieron que s'entamara un Conseyu Asesor de RTVA onde va haber representación social y onde podríen entrar instituciones y entidaes comprometíes cola defensa de les llingües propies d'Aragón, país que pela primer vez va tener una Dirección Xeneral de Política Llingüística.

Asturies

¿Porcentaxe d'emisión n'asturianu? ¿Participación de l'Academia de la Llingua Asturiana nel Conseyu Asesor? ¿Programación infantil n'asturianu? ¿Apoyu al sector audiovisual asturianu? ¿Modelu llingüísticu?