Llinguavisión

Había tiempu que nun escribía y volvemos a casa por Eurovisión. Nun podía dexalo pa prau. Y ye que pela primer na historia ganó un cantar nuna llingua minoritaria. Ucranía y la cantante Jamala foron los ganadores con 1944, tema interpretáu n'inglés y tártaru de Crimea que fala sobre la deportación del pueblu tártaru pol gobierno de Stalin. Esti país superó a los homófobos rusos, que yeren los favoritos, y a la europea Australia -lo d'Israel yá ta como aceptáu y tal, pero lo d'Australia...-. Por suerte, Eurovisión ye gai y los eurofans nun permitieron qu'ún de los símbolos de la so cultura vaiga pa un país onde s'exerce la represión contra'l colectivu LGTB. Ah,  espera, non, que'l votu del públicu que fixo a Cochita Wust ganadora hai dos años foi nesta ocasión pa Rusia. Ye verdá eso de qu'Europa güei ta nuna encruciyada... 

L'estribillu del cantar ganador ta en tártaru de Crimea, idioma que tien unos 300.000 falantes, y son frases que Jamala escuchó de la so bisgüela, espresando que yá nun podría vivir la so mocedá na so ciudá y qu'acabaren col so mundu. Nun yera la primer vez qu'un cantar nuna llingua minoritaria participaba nel festival, pero sí la primer vez que se fai col trunfu. Per otru llau, ye de reseñar la xente que se quexó per twitter de que'l cantar de TVE fora n'inglés (probablemente los mesmos que dirán que falar gallegu o asturianu ye zarrase al mundu). 

Por ciertu, esti añu vuelve'l Premiu al Meyor Cantar. Esperamos velo en directo en TPA, que pa eso ta meyor organizáu y tien más emoción qu'una preselección de TVE.

Catalunya a Eurovisió

Queden poques hores pa qu'acabe la campaña electoral más importante de la historia de Cataluña y los unionistes saquen los últimos cartuchos. Ún d'ellos ye la posibilidá o non de que l'Estáu catalán pueda participar n'Eurovisión. La cuestión pue parecer una pih.ada, pero'l festival ye ún de los eventos más importantes del mundu; participar nel mesmu supondría'l reconocimientu esplícitu del restu de delegaciones y una visibilidá de la existencia del país a nivel européu. Gracies a Eurovisión, muncha xente sabe asitiar nel mapa a Andorra, Eslovenia o Malta. Mesmamente, de xuru qu'hai espectadores que piensen qu'Israel ta nel Continente pola so participación histórica nel certame dende 1973. El primer pasu pa tar nel concursu sería que TV3, la televisión publica catalana, solicite la entrada na Unión Europea de Radiofusión (UER) -entidá que nun tien nada que ver cola de Merkel-.

Ente los miembros de la UER tán les repúbliques balcániques que formaben Yugoslavia y les ex-repúbliques soviétiques, que se foron sumando al festival a lo llargo de la década de los noventa. Mesmamente, Montenegru decidió'l 21 de mayu del 2006 -un día depués del LI Festival d'Eurovisión- dixebrase de la confederación de Serbia y Montenegru. Nel 2007, los dos estaos nuevos participaron de manera independiente y Serbia ganó'l concursu gracies a la cantante Marija Šerifović. Otra manera, Kosovu lleva intentando participar dende'l 2009, dalgo a lo que s'oponen España, Rusia y Serbia.

Y ye que TVE ye una de les cadenes que manden n'Eurovisión por mor del éxitu d'audiencia que tien el festival n'España y porque la canal ye una de les que más invierte nel certame -fechu que-y permite clasificase a la final ensin pasar peles semifinales, lluxu que namás comparte con Alemaña, Italia, Francia y Reinu Xuníu-. Esto podría facer que TVE bloquiara la participación de Cataluña n'Eurovisión. Sicasí, nun sería dalgo nuevo. Por exemplu, en 1986, la Unión Europea de Radiodifusión utilizó la señal de la canal catalana pa la retresmisión del partíu de Copa d’Europa ente’l Barcelona y la Juventus de Turín. Asina, la rede europea de televisiones públiques nun fixo casu a les peticiones del Gobiernu español –que recordó que TV3 nun formaba parte del organismu–. El fechu entendióse como un reconocimientu a nivel internacional pa la canal catalana.

Nel 2004, Andorra Televisió (ATV), como miembru de derechu plenu de la UER, anunció que diba participar pela primer vez n’Eurovisión, dalgo que permitió que’l catalán pudiera sentise nel festival. El problema con TVE vieno porque ATV nun tenía medios abondo pa sufragar la participación, polo que la cadena decidió pidir la collaboración de l’autonómica de Cataluña pa la producción d’una preselección que tamién diba emitise per TV3 y onde los catalanes diben poder votar. El programa viose por dalgún mediu de comunicación español y por dellos directivos de TVE como una intromisión de Cataluña nel festival. 

Otra manera, nel 2009, Catalunya Música convirtióse en participante autorizáu de la UER, un alcuerdu históricu que-y permite a la emisora retresmitir conciertos de primer orde mundial. Anque les condiciones actuales d’emisora rexonal impidiéron-y ser miembru activu –cola posibilidá d’acceder a la rede d’Eurovisión y a les asamblees de la entidá–, l’organismu européu reconoció que l’actividá de Catalunya Música yera útil pa la UER. Amás, l’alcuerdu permite que les producciones musicales catalanes tengan proyección acullá del ámbitu llingüísticu.Ye dicir, TV3 yá tien un pie dientro de la UER...

Pel momentu, nin Junts pel sí nin la CUP nin la televisión catalana falaron del tema, anque hasta existe una páxina pa reivindicar la presencia del país nel festival. Too ello magar que nel 2009, dellos diputaos de CiU y ERC reclamaron la participación de Cataluña n'Eurovisión en metá d'unes elecciones europees.
 

Veremos que pasa n'Eurovisión 2017...

¡Morrió'l Liet! ¡Puxa'l Suns!

El Liet International, l'Eurovisión de les minories llingüístiques, nun va volver celebrase. Dende que nel 2012 se celebrara n'Asturies como una de les ediciones meyor entamaes, el certame entró en decadencia por problemes d'organización y l'añu pasáu tuvo la so última edición n'Oldenburg (Alemaña). Sicasí, acaba de nacer otru festival cola mesma filosofía; el Suns Europe, que va celebrase n'Udine (Friul) esti 11 d'avientu y que ta entamáu por friulanos, ladinos y sardos.

Esti festival européu d'artes escéniques en llingües minoritaries va acoyer delles actividaes ente'l 25 de payares y el 11 d'avientu, pero'l concursu de cantar modernu va ser l'actividá de más sonadía. La participación ta abierta a toles minories llingüístiques incluíes na Carta Europea de les Llingües Minoritaries.

Les bandes asturianes que quieran siguir el camín de Xera, Alfredo González, El Trasno, Skama la Rede, Asturiana Mining Company y Dixebra, grupu qu'inauguró la presencia patria nel Liet nel 2008, puen unviar les sos candidatures hasta'l 1 d'ochobre y intentar, asina, ser un de los 8 finalistes. Los ganadores van recibir un premiu de 2.000 euros y un mínimu de dos contratos en festivales europeos.

O.T: Operación Tonada

El plenu del Conseyu de Patrimoniu Cultural d'Asturies, declaró la tonada asturiana como Bien d'Interés Cultural, la figura máxima de protección patrimonial existente. Según l'estudiu encargáu al músicu Héctor Braga y que tuvieron en cuenta los miembros del Conseyu, "l'asturianada o tonada ye la manifestación actual más destacada de la cultura musical asturiana, que funde los sos raigaños nel pasáu pero que sigue bien viva nel presente". Por eso, vamos recordar la presencia que tuvo hasta'l momentu la tonada nos medios de comunicación.

 

 

Y ye qu'esti xéneru musical tuvo presente na radio cuasi dende la so llegada a Asturies. Asina, l’aparición de les primeres emisores tamién supunxo l’espardimientu de l'asturianada al traviés de los concursos que foron emitiendo les emisores asturianes. El primer concursu importante que s’entamó foi nel añu 1947 y tresmitiólu en directo Radio Asturias. Estos eventos foron un auténticu filón p’atraer a los oyentes y dende les emisores de les ciudaes y villes del país fixeron sonar les primeres grabaciones de pizarra de los cantares clásicos de los años venti y tren­ta. Décades depués y cola llegada de la televisión, la tonada tamién tuvo presente gracies al periodista Carlos Jeannot, que punxo en marcha en TVE-Asturies l'espaciu Canción asturiana, que se tuvo emitiendo con éxitu ente 1989 y 1991 con un total de 98 programes.

 

 

Per otru llau, l'empiezu de les emisiones de RPA tuvo como protagonista al nuestru xéneru musical. Asina, a les 16:00 hores del 9 d’ochobre de 2006, Carlos Rubiera presentó Abriendo camín, un programa d’autor que xiraba alredor de la so obra, dende Conceyu Bable hasta l’actualidá, contestualizándola en cada momentu y a la que s’añadía una entrevista a un músicu asturianu o d’otres corrientes musicales. Un día depués estrenóse Música, músiques, programa que contaba con protagonistes de la canción asturiana y que dirixía Ismael González Arias. Actualmente, nengún d'estos espacios sigue n'emisión y la presencia de la tonada, y de la música asturiana en xeneral, ye cuasi inexistente en RPA.

Na televisión pública ye de reseñar el casu del espaciu Sones, emitíu dende'l 2009. Trátase del primer programa nel nuestru idioma emitíu en prime-time y que se convirtió nún de los éxitos d’audiencia de la canal. Esti espaciu, que desapareció de la emisión nel 2014, yera un musical especializáu en canción asturiana que s’emitía los domingos pela nueche y que llegaba tar perriba del 10% d'audiencia.


  

Actualmente, la presencia de la tonada nos medios públicos queda n'anécdota, polo qu'esperemos que la so declaración como BIC suponga un cambiu. Un exemplu sería lo que fai Canal Sur, la radiotelevisión andaluza, que cuenta cola emisora Canal Flamenco Radio, una cadena musical qu'empezó a emitir nel 2008 y que ta dedicada dafechu al flamencu. Per otru llau, la televisión de Canal Sur emite con muncho éxitu Se llama copla, un concursu musical asemeyáu a Operación Triunfo onde los concursantes interpreten canción española y copla y que llegó a convertise nel espaciu de más audiencia de tola historia d'esta cadena. Viendo esto, nun taría mal que TPA punxera en marcha'l so OT, el so Operación Tonada, un espaciu que valiera p'averar a la sociedá la nuestra música y pa renovar el xéneru.
 

Cantares, televisiones y identidaes colectives

El Festival del Cantar Mediterráneu foi un concursu musical al estilu d’Eurovisión que se celebró en Barcelona ente 1959 y 1967 y que llegó a emitise n’once televisiones europees. Nun primer momentu, el festival permitió cantares en catalán. Asina, en 1963 ganó “Se'n va anar”, interpretáu por Salomé y Raimon y únicu cantar nesti idioma nel concursu. L'éxitu provocó reticencies de la dirección de TVE y los entamadores viéronse obligaos a prohibir el catalán. En 1967,y por mor del éxitu de la Nova Canço, la llingua de Ramon Llul volvió al Festival, pero la victoria de Massiel n’Eurovisión fixo que TVE tuviera que concentrar tolos sos esfuercios económicos en ser la sé del festival musical más importante del mundu.

“La, la, la” foi’l cantar ganador d'Eurovisión en 1968. Joan Manuel Serrat foi nun principiu l'intérprete orixinal del cantar, pero unos díes enantes del festival anunció que quería realizar la so actuación en catalán, cosa que TVE nun permitió. Por eso, Massiel foi escoyida pa interpretala. Al final, l’artista fíxose cola victoria nel Albert Hall de Londres y la dictadura consiguió, al traviés de la música y la televisión, tresmitir una imaxe moderna del franquismu, amás d’una proyección internacional al tener qu’entamar un añu depués el festival.

"E Depois do Adeus" ye un cantar de Paulo de Carvalho, que representó a Portugal nel Festival d'Eurovisión de 1974. Anque quedó n’últimu puestu ye bien importante dientro de la cultura portuguesa -ye l'opening de la versión lusa de Cuéntame-. Y ye que na Revolução dos Cravos, los revolucionarios utilizaron les radios y la música pa dar señales a los militares favorables a la democracia. “E Depois do Adeus” sonó n’ Emissores Associados a les 22:55 hores del 24 d'abril de 1974, y sirvió pa que les tropes se preparararen. Depués, Rádio Renascença emitió "Grandola, Vila Morena", tema prohibíu pol réxime salazarista, dalgo que confirmaba que too taba en marcha.

En 1980 –añu nel qu’Israel nun participó-, Samira Saïd convirtióse na primera (y única) representante de Marruecos n’Eurovisión. Anque non con muncho éxitu, porque quedó nel puestu 18 ente 19 cantares. Depués d'un probe resultáu, Hasan II de Marruecos xuró que'l país nunca más diba participar nel festival. Con too, el cantar convirtióse nun éxitu y Samira na estrella pop más importante del mundu árabe.

Pola Guerra de Bosnia pensábase qu’esti país nun sería capaz d'emitir los sos votos en 1993. Sicasí cuando llegó la so vez pudo escuchase con interferencies: "Hello Millstreet, this is Sarajevo calling" (Hola Millstreet, llamando dende Sarayevu), lo cual xeneró un aplausu memorable del públicu. Al añu siguiente, fíxose la primer conexón per satélite y los portavoces salíen en pantalla. Cuando se vio a la bosnia'l públicu romplió a aplaudir, mesmo los presentadores del certame. Esi mesmu añu, Alma & Dejen interpretaron “Ostani kraj mene”, que recibió l’aplausu más llargu de la historia del festival. Sicasí, quedó’l decimoquintu ente 25 participantes

En 1998 y énte una espectación enorme, Dana International –una cantante transexual- representó a Israel n'Eurovisión col cantar "Diva", coincidiendo amás col 50 aniversariu del Estáu d'Israel. La ultraortodoxia israelina llegó a calificar a Dana como'l demoniu y recibió amenaces de muerte, un discutiniu que provocó que la televisión hebrea nun unviara comentarista al festival. Sicasí, Europa votó masivamente a Dana y numberosos mozos salieron a les cais de Tel-Aviv a celebrar el trunfu. Dana convirtióse na primer artista israelina en ser entrevistada pola MTV, n’actuar en Top of the Pops de la BBC y en vender 400.000 copies del so single en tol mundu. Entós, la so victoria empezó a ser vista como una victoria de los derechos del colectivu LGTB.

Ganadora de la primer edición d'Operación Triunfo, Rosa participó n’Eurovisión nel 2002 énte un país paralizáu. El festival algamó los mayores índices d'audiencia de la historia d’España y unió a tol país, dalgo que de xuru que-y prestó muncho a José María Aznar. Ye de reseñar que nesi añu producióse una fuelga xeneral, el decretu de reforma universitaria (LOU), l'aplicación del Plan Hidrolóxicu Nacional (PHN), la xestión del accidente del petroleru Prestige y l’apoyu a George Bush y Tony Blair contra “les armes de destrucción masiva”. Europe’s living a celebration…

Nel 2004, Andorra Televisió (ATV) anunció que diba participar pela primer vez n’Eurovisión, dalgo que diba permitir que’l catalán pudiera sentise nel festival. El problema vieno porque ATV nun tenía medios abondo pa sufragar la participación, polo que la cadena decidió pidir la collaboración de l’autonómica de Cataluña pa la producción d’una preselección que tamién diba emitise per TV3 y onde los catalanes diben poder votar. La situación xeneró un conflictu con TVE, que lo entendió como una intromisión de Cataluña nel festival. Mesmamente, especulóse con que TVE nun diba emitir la semifinal onde participaba Marta Roure interpretando “Jugarem a estimar-nos”. Al final, un cambiu nel Gobiernu español y na dirección de TVE confirmó la emisión de la semifinal al traviés de La 2.

Nel 2011, TVE refugó’l deséu de Lucía Pérez, primer gallega en representar a España n’Eurovisión, de cantar dalguna frase de “Que me quiten lo bailao” na so llingua materna. Ye más, la intérprete nun pudo grabar una versión nesti idioma hasta depués de participar nel festival. Esa versión estrenóse’l 24 de xunetu d’esi añu na gala cola que TVG celebra’l so aniversariu y da entrada al Día Nacional de Galicia.

Un añu depués, el Liet International celebróse en Xixón y amás de TPA y Radio Sele qu'emitieron l'eventu per Internet pa tol mundu, tuvieron presentes periodistes de les televisiones vasca -que emitió’l festival en diferíu-, friulana, frisia, samí y corsa y de la mesma Al-Jazeera. Otra manera, France 3 emitió'l Liet pa Córcega. Por eso, el movimientu de reivindicación llingüística nun quixo desaprovechar la cobertura medíatica y l'actu tuvo marcáu pola reivindicación de la oficialidá. Asina, unes lletrones que formaben la frase n'inglés S.O.S. Asturian Language foron les protagonistes nun convidaes del evento y tuvieron na boca de munchos de los interpretes.

Arab Idol ye un concursu que s’emite pela cadena MBC y que ye siguíu por millones de persones en tol mundu árabe. Contra tou pronósticu, la edición del 2013 ganóla Mohamed Assaf, un refuxáu palestín de 23 años que quedó per delantre de los representantes d’otros países más poblaos. La so victoria valió pa unir a los habitantes d’una nación dividida por barreres territoriales, relixoses y polítiques. Pela primer vez, tanto l’Autoridá Nacional Palestinal, en manes d’Al-Fatah y con poder en Cisxordania, como Hamás, que controla Gaza, coincidieron en felicitar a un artista que cola so voz unió a tolos palestinos y que demostró al mundu qu’esti país, amás de guerra y terrorismu, tamién sabe cantar.

Nel 2014, la Banda Gaitas El Trasno defendió’l cantar en gallego-asturianu “Volviche” nel Liet. Pela primer vez na historia, la llingua del Navia-Eo representó a tolos asturianos, dalgo mui simbólicu que mostró que yá dexemos de llau époques nes que’l mesmu nome d’esta fala o la so integridá llingüística yeren tema de polémica. Sicasí, El Trasno viaxó a Oldenburg ensin nenguna ayuda de l’Alministración. Tampoco la RTPA emitió –pela primer vez na so historia- el festival y nin faló d’él nos sos informativos. La situación coincide col patrociu que la empresa pública fixo del conciertu d’una cantante andaluza, conciertu que –gracies a dios o al diañu- nun se pudo llegar a celebrar porque la sevillana entró na cárcel por blanquéu de capitales.

.

Eurovisión ye gai (y puntu)

Nun hai nada más gai qu’Eurovisión. Nun tien sentíu esplicar por qué. Ye como tener qu’esplicar por qué nun hai dalgo más heteru qu’una final de la Champions o una manifestación del Foro de la Familia… Ye asina dende 1998, añu nel que Dana International, una muyer transexual, ganó'l festival y fixo qu'Eurovisión dexara de ser dalgo vieyo y empezara a ganar siguidores nuevos. Dende esa, el festival ye más gai cada añu, prueba d’ello ye la victoria nesta edición de l’austriaca Conchita Wurst y los glayíos contra Rusia, que digan lo que digan los medios españoles nun yeren pol conflictu d’Ucrania -país que tamién dio grandes momentos a la historia gai d'Eurovisión-, sinón contra les polítiques homófobes del Executivu de Putín. Val como muestra que mentes l’actuación de Tolmachevy Sisters, les representantes ruses, la parte mayor del públicu dexó de llau la so bandera nacional y llevantó la del arcu la vieya. 

Por eso, los políticos rusos, que son d’esos que piensen que’l mundu tien que ser masculín, blancu y heterosexual, yá tán anunciando que van dexar el festival y van crear ún propio, que nun van tar gastando perres nun festival que da voz a la cultura gai. En fin, coses de la política rusa y non de los rusos, como muestra que Conchita Wurst yá ye númberu ún nesti país. Y ye que por muncho que-y cafie al Putín, Eurovisión ye gai y ye lo que ye por ser gai y, por eso, presta tanto.

Una oportunidá perdida por España...

Top 5 Eurovisión

Por trabayu nun pudi facelo enantes, pero tovía tamos de resaca eurovisiva, asina que nun voi dexar pasar la oportunidá de facer el mio Top 5 eurovisivu.

5. Polonia

Ye una mezcla ente folclore, poligoneres y película porno que nun tien nengún sentíu, debe ser por eso polo que me presta tanto. Amás, ye’l cantar con más posibilidaes d’entrar na carpeta “Eurofrikaes” del mio MP3. Quedó nel puestu 14.

4. Francia

De lo más divertíu de la nueche, pero los eurofans son asina y dexaron a los franceses na última posición con namás 2 puntos. Mesmamente, munchos comentaristes calificaron l’actuación como’l “momentu friki de la nueche”. Y ye que’l restu ye música en lletres grandes…

3. España

“Europa no nos quiere”, “Eurovisión es política”, “España tenía que retirarse de Eurovisión” son dalgunes de les frases que se puen sentir añu tres añu nel programa post-festival de TVE. Patriotismu del ranciu. El problema ye que la televisión estatal nunca se toma en serio’l festival -y si non nun mandaría coses como esta-. Sicasí, esti añu Ruth Lorenzo fixo una de les meyores actuaciones d’España na historia n’Eurovisión. Puestu 10, pero merecía tar más p'arriba.

2. Suiza

Una pasada de canción y el puestu 13… Tan indignáu toi que muto en Nuria Fergó. Por ciertu, minutu 2' 17'' y podéis ver la bandera d'Asturies, que siempre salimos y nun montamos tanto como los catalanes.

 1. Austria
 

Hailos que ven una frikada más de les munches qu’hai n’Eurovisión, hailos que dicen que ye una balada mui asemeyada a les bandes sonores de James Bond, hailos qu’hasta namás ven un maricu antroxáu de muyer…Otros vemos un glayíu d’Europa a favor de la diferencia, un glayíu pola llibertá individual y contra les polítiques homófobes de Rusia y los sos países satélite. Y ye que con Conchita y gracies a Eurovisión, el nuestru continente acaba de dar un pasu alantre.

Guía eurovisiva pa friquillingüistes

El Festival de la Canción d’Eurovisión ye ún de los programes más vistos del mundu y ún exemplu de cómo la música y los sos intérpretes puen convertise en símbolu d’un país y d’una cultura. Los entamadores del certame cambiaron delles veces la normativa sobre la utilización de los idiomes, dende la llibertá d’elección –norma que vuelve tar vixente güei y que fixo qu’en 1974 Suecia ganara col “Waterloo” d’Abba interpretáu n’inglés-, hasta la obligatoriedá d’usar una de les llingües oficiales del país, normativa que desapareció en 1998, añu nel que la israelina Dana International ganó’l festival con un cantar n’hebréu y castellanu.

Pel momentu, l’inglés ye l’idioma dominante nesti festival. Prueba d’ello ye que desque nel 2007 la serbia Marija Šerifović ganó con "Molitva" ("Oración") nun llegó al pódium nengún cantar interpretáu nun idioma local. Hasta los dueños d’Europa ganaron el festival nel 2010 con un cantar dafechu n’inglés. Anguaño, España va tar representada col cantar "Dancing in the raing", que tien una parte grande de la lletra n’inglés. La situación llevantó les crítiques de la RAE, que-y mandó una carta al director de RTVE pa criticar la decisión. Tamién hubo dellos espectadores que refugaron la decisión énte la defensora del espectador de RTVE. Mesmamente, preguntáronse por qué la Corporación nunca mandara a Eurovisión nengún cantar en dalguna de les otres llingües oficiales. Ye de reseñar, que nel 2002, la RAE tamién criticó la participación de la perconocida Rosa nel festival. El motivu yera que "Europe’s living a celebration" tenía un títulu n’inglés, dalgo que calificaron como “barbaridá” y como contrario a les polítiques de promoción internacional del castellanu.

Anque n’Eurovisión namás puen participar televisiones estatales, dellos foron los idiomes minoritarios que pudieron sentise nel festival. La cantante irlandesa Sandie Jones representó al so país en 1972 con un cantar en gaélicu, el grupu suizu Furbaz fixo lo mesmo en 1989 col romanche y nel 2012, el grupu folclóricu rusu Buránovskiye Bábushki quedó segundu con un cantar n’udmurtu, llingua cola que se tuvo qu'enfrentar l'asturianu nel festival Liet. Mentanto, un estáu tan xacobín como Francia foi representáu en 1993 y 2011 en corsu, mentes qu'en 1996 foi en bretón. Otra manera, nel 2003, Urban Trad quedó segundu nel concursu con un cantar nuna llingua artificial interpretráu por una cantante d’orixe gallega.

Nel llau contrariu ta l’Estáu español, que nel 2011 refugó’l deséu de la gallega Lucía Pérez de cantar dalguna frase de “Que me quiten lo bailao” na so llingua materna. Ye más, la interprete nun pudo grabar una versión nesti idioma hasta depués de participar nel festival. Otra manera, hai xusto una década, Andorra Televisió (ATV), como miembru de derechu plenu de la Unión Europea de Radiofusión (UER), anunció que diba participar pela primer vez n’Eurovisión, dalgo que diba permitir que’l catalán pudiera sentise nel festival 35 años depués de que TVE apartara a Serrat del festival por querer interpretar “La, la, la” na so llingua. Sicasí, ATV nun tenía medios abondo pa sufragar la participación, polo que la cadena decidió pidir la collaboración de l’autonómica de Cataluña pa la producción d'una preselección que tamien diba emitise per TV3 y onde los catalanes diben poder votar. 

Pa escoyer el candidatu que diba facer que pela primer vez el catalán sonara en toles cases d’Europa, ATV y TV3 emitieron 12 punts, un programa grabáu nel Auditoriu Nacional d’Andorra pero realizáu por una productora barcelonesa. L’espaciu tamién valió pa que tolos espectadores pudieran votar pol meyor cantar en catalán de tolos tiempos. El programa vióse por dalgún mediu de comunicación español y por dellos directivos de TVE como una intromisión de Cataluña nel festival, un concursu que-y da a la pública española ún de los meyores datos d’audiencia del añu y qu’a nivel mundial axunta hasta 600 millones d’espectadores. Mesmamente, nos meses anteriores al festival, especulóse con que TVE nun diba emitir la semifinal onde participaba Andorra y tampoco nun-y diba ceder a la emisora catalana la señal, polo que TV3 anunció la busca de midíes alternatives pa que los sos espectadores pudieran ver a Marta Roure interpretando "Jugarem a estimar-nos", la primer composición en catalán nel concursu musical con más audiencia del mundu. Al final, un cambiu nel Gobiernu español y na dirección de TVE confirmó la emisión de la semifinal al traviés de La 2.

Como anécdotes, reseñar que nel 2006 una rapaza mierense emigrada a Andorra, Jeniffer Serrano, tuvo que deprender catalán nun par de selmanes pa poder representar al país n’Eurovisión. Sicasí, el so cantar, “Sense tu”, namás algamó los 8 puntos que-y dio España, hasta’l momentu’l peor resultáu d’Andorra nel festival. Dos años depués, la participación de la catalana Gisela llevantó una polémica importante, pero non pola so nacionalidá sinón porque’l cantar que diba defender, “Casanova”, yera n’inglés. El mesmu Gobiernu andorranu llegó a quexase publicamente pol tratu al idioma propiu.

Andorra nun participa nel festival dende’l 2009 por motivos presuestarios –la inversión económica yera mui grande y los resultaos mui pequeños-. Sicasí, siempre nos quedara Portugal, qu’añu tres añu ye fiel a la so llingua y al so folclore, pero quién sabe, igual nel 2015 podemos volver a sentir el catalán nel festival gracies a un cantar escoyíu por TV3... Igual tamién dalgún día los portugueses manden un cantar en mirandés...