Trabayu d'árabe

Avoda Aravit (Trabayu d'árabe) ye una serie d'éxitu israelina que llamó la atención de mediu mundu. Y ye qu'esta producción, con un títulu que se traduz del hebréu coloquial como trabayu de mala calidá, fai chancia coles rellaciones culturales ente árabes y xudíos. Asina, muestra la realidá d'una sociedá mista como ye la israelina, pero onde too se cuenta al traviés de los güeyos xudíos. Avoda Aravit ta protagonizda por Amjad, un periodista árabe-israelin que trabaya nun periódicu n'hebréu y que mantién una rellación d'amor-odiu cola so identidá y el so deséu d'integrase dafechu na sociedá israelina -y, polo tanto, xudia-. La serie, la primera que muestra una visión árabe de la sociedá xudía, ta rodada n'hebréu y árabe y tien delles escenes cola llingua como protagonista, como la primera del primer capítulu, onde nun control policial Amjad pídi-y a la so fía que salude al policía n'hebréu pa evitar que rexistren el coche.

#LaTVnaRadio; Realitys

La tele na radio I

Iniciativa pol Asturianu nes ondes pon en marcha sección nueva col periodista Damián Barreiro, especialista en tv y con un garapiellu llibros espublizaos al respeutive. Ufrirános toles selmanes una nueva seición áu treslladaremos un mediu tan importante como ye la televisión a la radio, afondando en series, películes, etc que se podríen usar pa normalizar el nuesu idioma.

Entrevista en "Naguando"

That's Asturian!

Dellos son los cursos televisivos pa deprender llingües a distancia. Ún de los que más nos pue sonar ye That’s English, el programa didácticu de llingua inglesa dependiente del Ministeriu d’Educación emitíu en La 2 ente 1993 y 1999. Otra manera, los mesmos Bolechas cuenten con un cursu gallegu-inglés na TVG. Sicasí, l’idioma de Shakespeare nun ye l’únicu que cuenta con ferramientes televisives p’afalar el conocimientu de les sos regles ortográfiques, porque nes televisiones de proximidá surdieron espacios qu’empezaben de cero y mostraben al espectador como usar l’idioma en situaciones de la vida cotidiana.

Asina, ETB emitió ente 1986 y 1990 Bai Horixe (Eso mesmo), un espaciu que se convirtió nel primer cursu televisivu pa deprender vascu y que tovía se sigue emitiendo en delles televisiones locales del País Vascu. L’espaciu, producíu por ETB y la Organización pa la Alfabetización y la Reeuskaldunización d’Adultos (en vascu HABE), contó con 30 capítulos y tuvo un manual d’exercicios. 

Per otru llau, nel país vecín tamién se realizó ¿Imos aló? (¿Vamos allá?), un programa qu’emitió TVG ente 1989 y 1990. L’espaciu surdió depués d’un concursu d’idees entamáu pola Dirección Xeneral de Política Llingüística. El proyectu ganador foi ésti, onde dellos moñecos daben lleciones a los espectadores pa que pudieran conocer meyor l’idioma. 

Otra manera, nes Isles Britániques podemos topar Speaking our language un espaciu pa deprender gaélicu que s’emite per BBC Alba, mentes que TG4, la canal gaélica de la República d’Irlanda, emitió hai tiempu’l programa Now You’re Talking, col mesmu formatu que l’anterior y intentando enseñar l’idioma local dende l’inglés. ¿Nun podríen l’Academia de la Llingua y RTPA collaborar pa entamar un cursu asemeyáu?

Per otru llau, la televisión actual fai un apueste importante polos programes de telerrealidá, con espacios asemeyaos a Gran Hermano. El fomentu de les llingües minoritaries tampoco nun foi ayeno a esti procesu. Asina, nel 2004, ETB1 estrenó Barnetegia, que garra’l nome de los centros oficiales d’enseñu de vascu y onde doce concursante tuvieron dos meses enciarraos pa mostrar los sos progresos col idioma y la so convivencia. Del mesmu mou, TG4 emitió Ní Gaelgoir Mé, versión del programa galés cariad@iaith:love4language, onde persones famoses intenten deprender la llingua propia nuna selmana. ¿Imaxináis a Melendi y a Luján Argüelles na UABRA?

Amás, V Televisión, una canal privada de Galicia, cuenta col espaciu Galego con curso, un reality show que tien un títulu que xuega coles palabres y el conteníu del programa. Nél, cada venti díes participen seis alumnos con perfiles mui estremaos: dende’l gallegofalante que nun deprendió a escribir la so llingua o l’inmigrante qu’acaba de llegar y quier conocer meyor la fala de Rosalía. Toos ellos asisten a una clase real onde se divierten y deprenden l’idioma, al empar que lo fai l’espectador. 

¿Con qué formatu vos quedáis pa facer el primer cursu audiovisual pa deprender asturianu?

Guía pa poner en marcha una industria audiovisual

Los primeros pasos de la ficción televisiva en cada nación beben de la lliteratura. Un exemplu ye que nos años ochenta, cuando Pilar Miró tuvo al mandu de TVE y se punxeron en marcha los Estudios Buñuel –momentu nel que s’empieza a poder falar d’industria audiovisual española-, la televisión estatal produció series como Los gozos y las sombras, basada na obra de Torrente Ballester. La serie foi tou un éxitu y abrió’l camín a l’adaptación d’otres noveles de la lliteratura española. Ensin ella, igual güei nun podríemos falar de l’éxitu internacional d’El tiempo entre costuras. L’audiovisual en llingües minoritaries tamién siguió esi camín. Asina, les primeres películes rodaes en vascu son Zergatik Panpox, Ehun metro y Hamaseigarrenean aidanez, mediometraxes de 1985 englobaos dientro del proyectu Irati, subvencionáu pol Gobiernu vascu, y que llevó tres famoses noveles contemporanees a la pantalla grande. Per otru llau, la segunda ficción creada por TV3 foi Manoscrit del segon orige, emitida en 1985 y basada nun de los llibros más vendíos de la lliteratura del país. Otra manera, el primer productu de ficción de TVG foi Novo de Parmuíde, estrenáu na cadena en 1987 y basada na obra del escritor Álvaro Cunqueiro. Nun sé qu'espera TPA a abrir el camín y adaptar Díes de muncho en formatu TV-movie...

Con too, a la hora d’empezar a producir teleseries suel empezase coles comedies. Trátase de productos de costu baxu, con guiones simples que busquen la risa del espectador. Un exemplu ye la serie americana The Fresh Prince of Bel-Air, la española Farmacia de Guardia o la gallega Pratos Combinados, que fala d’una familia d’emigrantes gallegos en Suiza que torna a la so tierra pa poner un bar. Esta ficción, estrenada en 1995, convirtióse na primer teleserie gallega. Per otru llau, la primer serie de TV3 foi la telecomedia Carme i David, cuina, menjador i llit, con guión de Terenci Moix. Sicasí, yá en 1979, TVE-Catalunya estrenara Doctor Caparrós, la primer serie de ficción catalana. Otra manera, ún de los productos clásicos de la televisión en vascu ye Bi eta bat, que fala de dos moces y un mozu que comparten pisu nel barriu vieyu de Donostia. El so éxitu foi tal que, 30 años depués del so estrenu, ETB llegó facer un remake de la mesma. Ensin dulda, el teatru costumista asturianu podría ser una base bona pal nacimientu de la telecomedia astur.

El pasu que vien depués ye pasar de la telecomedia simplona de media horina a la serie selmanal d’una hora qu’amesta drama y comedia. Trátase de producciones onde’l costumismu y el factor sentimental enganchen a l’audiencia al traviés de personaxes fixos y esporádicos que se convierten nel filu argumental. Falemos de series como Médico de Familia, la catalana Estació d'enllaç, sobre los trabayadores y pasaxeros d’una estación de tren, o la gallega Mareas vivas, que fala de les rellaciones de los habitantes de la ficticia villa marinera de Portozás. Esta serie llegó axuntar al 40% de los gallegos énte'l televisor y convirtióse nel aniciu d'una industria audiovisual gallega. 

Más tarde, depués de consiguir producir una serie d’éxitu, llegó’l momentu de centrase nel drama. Ye’l momentu de facer la primer telenovela de producción propia. Sicasí, ye de reseñar qu’esto ye Europa, nun somos Llatinoamérica y equí nun rezamos a la virgensita de Guadalupe pa que José Alfredo vuelva y reconoza al so fíu. Les telenoveles en llingües minoritaries puen tirar per dos llaos: facer apueste pol serial costumista –tomando como exemplu les series diaries de la BBC, modelu de la telenovela en vascu Goenkale y de les telenoveles catalanes-, o siguir el camín abiertu poles grandes soap opera americanes de los 80, con títulos como Dinastia o Falcon Crest. Precisamente, l’adaptación que fixeron los gallegos de les lluches pa controlar el negociu del vinu na comarca –dexando de llau’l Napa Valley y centrando la historia nes Rias Baixas- convirtióse en tou un éxitu. ¿Pa cuándo una adaptación ambientada en Nava y col mundu de la sidra como protagonista?
 

Yá tenemos una industria audovisual en marcha. Hai xente que vive d’esto y yá tenemos un star-system propiu. Llegó’l momentu d’empezar a innovar y mirase d’igual a igual cola televisión americana y británica –llegando a tar perriba en calidá de la televisión española- ¿Por qué nun producir una serie basada nes grandes producciones d’intriga histórica de la BBC? Asina, fixeron los gallegos con As leis de Celavella, una serie de misteriu ambientada en 1925 y que ye reconocida como una de les meyores producíes pola TVG. Per otru llau, ¿por qué nun dexar de llau l’humor costumista y adaptar la sitcom americana a la nuestra realidá cultural? Asina, siguiendo'l camín de series como Friends o 7 vidas, los catalanes punxeron en marcha Plats Bruts, la serie de más éxitu de TV3 y que destaca pola so parodia de la sociedá catalana y del catalanismu.

Agora, con una industria yá consolidada, ye’l momentu de dexar el bucolismu, d’empezar a facer series onde los bonos nun son tan bonos y nes qu’hai malos que tienen el so encantu, anque sía un mafiosu como Tony Soprano o un narcotraficante como Walter White, protagonistes de The Sopranos y Breaking Bad, respectivamente, producciones consideraes como les meyores series de la historia de la televisión. Esi camín, el malu al que-y garres cariñu, ye’l que siguieron los guionistes de Matalobos –ente los que tán dalgunes de les promeses de la lliteratura gallega- pa crear a Carmelo Matalobos, patriarca d’una familia que controla’l negociu del narcotráficu na ficticia villa de Sardiñeira –anque los realizadores nun disimulen que ye A Coruña-. La serie ta considerada como la meyor fecha pola TVG hasta’l momentu y una de les meyores de tola televisión estatal. Y repito lo d’hasta’l momentu, porque ayeri la canal gallega estrenó’l thiller Serramoura y algamó más espectadores en Galicia que’l Gran Hermano de Tele 5 y que Torrente 3 n’Antena 3. Esta producción, que munchos yá comparen con Matalobos, ta ambientada nun pueblu de la Galicia interior onde un asesinatu produz qu’españen los secretos enterraos dende hai años -una temática mui diferente a la de Mareas vivas, onde hasta'l cacique del pueblu yera bono-. La serie podría ambientase nun pueblu pequeñu del sur de los EEUU o d’Inglaterra, pero pasa nun llugar gallegu onde toos tienen dalgo qu’esconder. Invítovos a que la veáis y a qu’imaxinéis una igual ambientada nun pueblu del suroccidente asturianu…