Un camín animáu

Nuna televisión, lo normal ye dir probando como funcionen determinaos proyectos pa depués facer un apueste pol formatu. Por exemplu, depués del éxitu d’Asturianos en el mundo, TPA emitió De paso por…, sobre la xente que visita Asturies, o Asturianos por ahí, sobre los asturianos que viven n’otres comunidaes del Estáu. Sicasí, nel casu de TPA parez que nun ye lo mesmo si tamos falando d’un programa n’asturianu. Camín de cantares llegó al 30% d’audiencia, pero TPA nun quixo facer apueste por formatos asemeyaos. Tampoco nun valió pa nada la emisión d’Al aldu, espaciu de cinco minutos que mostró la posibilidá de facer programes d’humor, d’información y de cocina n’asturianu, pero que quedó namás nuna prueba sobre lo que se podría facer. Lo mesmo pasó con El cuentacuentos de Presta Asgaya, doblaxe al asturianu d’un espaciu emitíu enantes en castellanu –y que puxa la discriminación positiva hacia la llingua minoritaria-, y qu’anque llegaron a anuncialo como’l guañu d’una escuela de doblaxe quedó nun esperimentu.

Precisamente, nel campu del doblaxe de programación infantil ye onde la TPA tovía tien muncho por facer –ye la única televisión autonómica de tol Estáu español ensin programación infantil y la única europea d’una rexón billingüe ensin espacios pa los más neños nel idioma propiu-. Pa probar como funciona’l doblaxe d’animación al asturianu, la Xunta pola Defensa de la Llingua Asturiana yá fixo delles propuestes nel so Informe sobre la necesidá d’una programación infantil n’asturianu en TPA y yá pidió a Política Llingüística, depués de ver l’éxitu del álbum d’Astérix, que xestionara cola nuestra televisión el doblaxe de dalguna película d’animación protagonizada pol héroe galu. Axuntó a estes, otres dos propuestes de doblaxe al asturianu que valdríen pa probar como funcionen productos asina nel nuestru país. Amás, son películes con un argumentu centráu na defensa del patrimoniu cultural y de les que tienen los derechos dalguna televisión autonómica, dalgo que facilitaría a RTPA los trabayos de xestión.

Os vixilantes do camino

Trátase d’una película y d’una serie de 13 capítulos –en realidá la película ye un montaxe de los cuatro primeros episodios- producida pola TVG en 1999 y protagonizada pola estrella de la programación infantil en gallegu: Xabarín. Nella, Xabarín y los sos collacios tienen que lluchar contra’l malváu Dabondo, que quier acabar con tolos monumentos qu’hai a lo llargo del Camín de Santiagu infectándolos col mal de la piedra y, asina, poder reconstruilos de forma virtual en Dabondópole, una especie de parque temáticu. Asina, la serie presenta en clave d’humor una crítica a les corporaciones multinacionales y una promoción de la conservación del patrimoniu. Foi la primer serie d’animación fecha pola TVG y tuvo que realizase nuna empresa madrilana al nun existir en Galicia productores que pudieren encarar esti trabayu. Güei, 15 años depués, el país vecín compite con Cataluña por ser la industria d’animación más importante del Estáu.

Pues ver el llargometraxe equí.

Gartxot

Gartxot ye una lleenda vasca sobre la que l’escritor Arturo Campión escribió ún de los sos rellatos más conocíos: El bardu d’Itzaltzu, de marcáu calter nacionalista y ambientáu ente los sieglos XI y XII n'Orreaga/Roncesvalles. Na historia, Gartxot ye’l depositariu de la tradición oral de los vascones, pero cola llegada de monxos foriatos al monesteriu d’Izalzu impónse l’usu de la llingua culta –el llatín- y de cantares que son ayenos a los de la población. Les últimes adaptaciones d’esta historia, un cantu a favor de la cultura propia, son un cómic del 2003 y una película de dibuxos animaos estrenada nel 2011 y participada por ETB. Pel momentu, namás existe la versión orixinal y dos ediciones con subtítulos en castellanu y bretón. Naguamos por una versión n’asturianu d’esta película, que, anque d’animación, ye una historia bien escura dirixida a un públicu más adolescente.

Pues ver el llargometraxe (V.O.S. en bretón) equí.

5 claves pal éxitu d'una programación infantil n'asturianu

La Xunta pola Defensa de la Llingua Asturiana acaba de presentar l’Informe sobre la necesidá d’una programación infantil n’asturianu en TPA. Hasta ehí too perfecto y poco más qu’añadir a lo que diz esti documentu, que reseña que la nuestra televisión ye la única canal europea d’una comunidá billingüe que nun tien programación infantil nel idioma propiu. Sicasí, ocúrreseme facer repasu per dalgunes de les característiques de los espacios pa neños del restu d’autonómiques del Estáu: unes característiques asemeyaes en tolos casos y que puen dar les claves pa qu’un programa infantil n’asturianu sía un éxitu na TPA.

1. Inventar un contenedor infantil

Toles televisiones tienen ún. Babalá, en Canal 9; Club Super 3, en Cataluña; o Betizu, nel País Vascu. Sicasí, vamos poner como exemplu’l casu gallegu: Xabarín Club. L’espaciu estrenóse en 1994 y inclúi series de dibuxos animaos, videoclips y espacios de producción propia. El programa editó siete discos que popularizaron la música en gallegu y que xeneraron delles xires de conciertos. L’espaciu convirtióse nuna plataforma p’actores y músicos y nun fenómenu social con más de 100.000 afiliaos -llegó a poner nome a la xeneración de gallegos que medró nos noventa, la Xeneración Xabarín-. Actualmente, cubre unes diez hores d’emisión en TVG2. Como curiosidá, dicir que si nel casu gallegu’l protagonista del espaciu ye un animal tan característico de la so gastronomía como’l gochu –nesti casu un xabalín, un gochu bravu, lo que-y da un puntu gamberru-, nel casu vascu ye betizu, que ye’l nome de la raza de vaca característica d’esti territoriu. ¿Por qué personaxe facéis apueste pa protagonizar un espaciu infantil n’asturianu? ¿Asturcones, pites o seres mitolóxicos –dalgo que yá intentaron en TPA ensin tener nin idea de mitoloxía, anque podría quedar mui bien-?

2. Facer un apueste pol anime

Disney nun ye mui amigu de les llingües minoritaries. Sicasí, les autonómiques alcontraron nel anime xaponés una manera d’enganchar a l’audiencia más menudo –y tamién a l’adolescente-. Un exemplu ye Dragon Ball, serie que s’estrenó pela primer vez nel Estáu en 1990 na televisión catalana, pa depués pasar al restu d’autonómiques y hasta a Antena 3. La serie tuvo en tolos territorios más del 30% d’audiencia y sigue reponiéndose más de venti años depués del so estrenu. Mesmamente, dalgunos cómics y películes protagonizaes pol Son Goku tuvieron como idioma vehicular el catalán, el vascu o'l gallegu, lo que fixo que se convirtiera en tou un iconu de la normalización llingüística y nel meyor profesor de la llingua propia. Dragon Ball ye l’exemplu más importante, pero tamién hai otros animes que tuvieron un éxitu grande, como Shin-Chan o Doraemon.

3. Reponer series mítiques.

Anque la programación infantil tea dirixida a los neños, nel casu d’un espaciu nuna llingua minoritaria ye importante intentar fidelizar a otres estayes de la población al traviés de la emisión de series clásiques como Los Picapiedra o Los Pitufos, producciones coles que medraron les xeneraciones anteriores y qu’agora podríen volver a sentase delantre del televisor –y sentar a los sos fíos- pola curiosidá de veles n’asturianu. Un exemplu ye qu’esti añu toles televisiones autonómiques estrenaron Heidi y Marco, les dos con un doblaxe a la llingua propia.

4. Facer apueste pola música

La escolarización n’asturianu nun sería lo mesmu ensin el trabayu impagable de Xentiquina. Hai una xeneración que deprendió les palabres de los güelos al traviés de los cantares de Nacho Fonseca. Nel restu de comunidaes pasó lo mesmu, pero nesti casu gracies a la televisión, dalgo que llega a toles cases y muncho meyor que cola precariedá del asturianu nes escueles.

5. Producir series propies

Col pasu del tiempu, les televisiones autonómiques tamién apostaran polos producción de series infantiles, dalgo que xeneró una pequeña industria d’animación. Mesmamente, munches series tuvieron basaes en personaxes popularizaos pola lliteratura. Un exemplu, Les tres bessones, serie d’histories basaes nos personaxes de la escritora catalana Roser Capdevila i Valls. La serie d'animación foi tou un éxitu y traducióse a 35 llingües –mesmamente, TV3 emitióla n’aranés-. Asina, la venta de la serie a 108 países permitió universalizar histories protagonizaes por elementos estrictamente catalanes. Otru exemplu ye Os Bolechas, adaptación d’una conocida serie de la lliteratura infantil en gallegu, que depués de 250 llibros y 1.000.000 de llectores convirtióse nun auténticu fenómenu social nel país vecín. Nel casu d'Asturies, de xuru que personaxes como Xicu y Ventolín o los de les aventures de Fontenebrosa quedaríen mui bien llevaos a la televisión.