La tele na radio I

Iniciativa pol Asturianu nes ondes pon en marcha sección nueva col periodista Damián Barreiro, especialista en tv y con un garapiellu llibros espublizaos al respeutive. Ufrirános toles selmanes una nueva seición áu treslladaremos un mediu tan importante como ye la televisión a la radio, afondando en series, películes, etc que se podríen usar pa normalizar el nuesu idioma.

Misiva participa nel concursu de grupos en llingües minorizaes del festival Euskal Herria Zuzenean

Otru añu más l’EHrZ, concursu de grupos de música de naciones ensin Estáu y en llingües minorizaes del Euskal Herria Zuzenean, vuelve tener representación asturiana. La banda moscona de punk-rock Misiva ye la encargada de representar a Asturies nesta edición. El plazu de votación del públicu ta abiertu hasta’l 20 de marzu; d’estos votos y de la selección del xuráu saldrán los grupos que van tocar nel festival más importante d’Iparralde (País Vascu francés).

Vascos, bretones, catalanes, gallegos… un total de 48 formaciones de delles naciones vuelven a tar presentes na segunda edición del concursu EHrZ. Tres la participación de Skontra y La Tarrancha l’añu pasáu, esti 2015 ye Misiva l’únicu grupu asturianu presente nel eventu. El cantar ‘Foriatu na mio ciudá’ –adelantu del so próximu trabayu - ye la so carta de presentación énte’l xuráu y la votación del públicu. Pa puxar por ellos namás hai qu’entrar na web, da-y a “Honen ALDE Bozka”, meter el mail y validalo nun corréu que llega a la bandexa entrada.

Los grupos escoyíos van tener distintos premios: unos van apaecer nun recopilatoriu dixital, otros tocarán na venti edición del Euskal Herria Zuzenean, otros van tar presentes nel festival Gernikako Lekuak y otros van venir a tocar a Asturies el 24 d’abril nuna actividá organizada ente’l EHZ y Ixuxú Asturies-Euskal Herria elkartea.

Celtic Media Festival: un alcuentru pal audiovisual celta

El Celtic Media Festival ye un festival audiovisual que se celebra dende hai 34 años de forma rotatoria ente Irlanda, Escocia, Gales, Cornualles y la Bretaña francesa, pa promover les llingües y cultures de los nomaos países celtes al traviés del so talentu audiovisual. Celtic Media Festival 2015 va celebrase n'Inverness dende 22 hasta 24 d'abril del 2015. Na edición d'anguaño compiten producciones repartíes ente un total de 19 categoríes. Serramoura, serie de la TVG producida por Voz Audiovisual, foi escoyida na categoría de Meyor Serie de Ficción, onde comparte candidatura con series de la BBC, como Sherlock (Gales) o Shetland (Escocia), y de la RTE irlandesa, como Love/Heat.

Ambientada nel mundu de la madera, la producción gallega ye un thriller rural que cuenta la historia d'un llugar del interior del país vecín, con una vida que va vese alteriada pol asesinatu brutal d'una de les sos vecines y la llegada d'un investigador de métodos agresivos, que p'afayar quién mató a Mónica Triáns va entrar en griesca colos impenetrables habitantes d'esta villa. Toos guarden dalgún secretu y tamién dalguna razón pa cometer esi crime espantible.

Tamién ta nominada Bannan, la primer serie de BBC Alba y una de les producciones de más éxitu d'una televisión dafechu en gaélico-escocés qu'empezó a emitir nel 2008. La serie, que fala d'una muyer que vuelve al so llar depués de 8 años, foi vista pol 62% d'audiencia de la canal. Per otru llau, Corp + Anam ye un thriller irlandés que muestra'l prestixu y calidá de la ficción producida por TG4. Trátase d'un thriller sobre la vida d'un reporteru de sucesos y el papel que xuegan los medios de comunicación nes desgracies humanes. 
 

Estes producciones rodaes en llingües minoritaries van midise cara a cara con series emitíes na primer canal de BBC, como la mundialmente conocida Sherlock o como Shetland, producida pola BBC escocesa y que fala d'un detective qu'investiga un crime nes isles que dan títulu a la producción. P'acabar, la irlandesa Love/Hate ta ambientada nos barrios más peligrosos de Dubín y bien ceo va emitise en televisiones d'Australia, Israel, Brasil o EEUU.

La inesistencia d'una industria audiovisual asturiana y tener una TPA más enfotada en patrocinar conciertos de folclóriques condenaes por blanquéu de capitales, fai qu'Asturies nun tea presente nesti festival. Con too, les bases establecen que puen participar nel mesmu Bretaña, Cornualles, Irlanda, Isla de Man, Escocia y Gales “y les rexones celtes de la Península Ibérica”. Amás, esclarien que van acutase'l derechu d'ampliar esta llista pa que puen participar producciones “cuando'l tema trate aspectos de la vida y la cultura, pasáu, presente o futuru d'un país celta”.

Una serie pa recuperar n'asturianu

Como homenaxe a Leonard Nimoy vamos falar d'una serie que dio orixe a un universu ficticiu formáu por más series, películes, llibros y videoxuegos. Mesmamente, a una lexón de fans llamaos trekkies, palabra admitida nel Diccionariu Oxford, y a un idioma, el klingon, llingua artística que cuenta con una gramática y un diccionariu, traducciones lliteraries y una versión de Google. Trátase de Star Trek, serie qu’a lo llargo de la so historia foi responsable d’inventar y popularizar munchos de los temes actuales de la ciencia ficción. Esta producción estrenóse pela primer vez n’EE. UU. el 8 de setiembre de 1966 y fala d’un futuru onde los seres humanos viven ensin engarradielles y trabayen con otres races alieníxenes buscando pel universu civilizaciones nueves. La serie orixinal consta de 79 capítulos que s’emitieron peles televisiones autonómiques. Amás, l’éxitu de la producción llevó a la realización d’otres cinco series —una d’elles animada— y doce películes, estrenada la más recién nel 2013. D’ente les series, Star Trek: The Next Generation y Star Trek: Voyager tamién se doblaron al catalán.

La serie orixinal contó colos meyores escritores de ciencia-ficción nel equipu de guionistes y los sos argumentos valieron pa introducir les esmoliciones sociales y polítiques de los años 60, incluyendo la discriminación sexual, el racismu, el nacionalismu o la guerra global. Por exemplu, Star Trek foi la primer serie americana en mostrar un besu interracial ente dos personaxes. Too ello nun tiempu onde la segregación racial yera una realidá n’EE. UU. Mesmamente, la protagonista del besu, la teniente Uhura, interpretada por Nichelle Nichols, foi una de les primeres muyeres negres en tener un papel protagonista nuna serie. L’actriz quixo dexar la producción porque pensaba que nun xugaba un papel relevante, pero’l mesmu Martin Luther King fixo que cambiara d’opinión al dici-y que yera un modelu pa munches muyeres negres.
 

En definitiva, la serie mostró un futuru onde nun existíen nin los prexuicios raciales nin el sexismu —una muyer podía ser astronauta, un rol femenín que naide imaxinara hasta la fecha—. Tamién hai episodios onde se traten temes relixosos o nos que pue lleer ente llinies l’apoyu al feminismu o a les rellaciones non heterosexuales, dalgo que pasaba nunos EE. UU. que refervíen énte’l movimientu de los derechos civiles afroamericanos, los disturbios de Stonewall y la segunda fola feminista. Los avances sociales que supunxo la serie foron reconocíos nel 2012 cuando Barack Obama se fotografió xunto a Nichelle Nichols nel mesmu despachu oval de la Casa Blanca faciendo’l saludu vulcanu.

yISop leng, ra'wI' Spock

Una aventura nel espaciu y nel tiempu

Nestos momentos, La 1 de TVE ta estrenando El ministerio del tiempo, una serie de ciencia-ficción que ta destinada a marcar un enantes y un después na producción española. Fala d’una institución secreta que depende de Presidencia del Gobiernu y que se dedica a vixilar les puertes de pasu a otres époques y, asina, impedir que naide pueda cambiar pasáu, presente y futuru pal so beneficiu. Dende enantes de la so estrena tán comparándola con Doctor Who, producción de la BBC que lleva emitiéndose dende 1963, polo qu’aparez nel Llibru Guinness de los Récords como la serie de ciencia-ficción con más tiempu n’emisión. Por eso –y mentes veo la de TVE-, voi aprovechar pa falar d’una de les producciones más mítiques de la historia de la televisión. 

Trátase d’una producción que fala de les aventures del Doctor, un viaxeru alieníxena que se tresllada pel tiempu y pel espaciu cola so nave Tardis, que tien forma de cabina de policía. Como señor del tiempu que ye, el Doctor pue rexenerar el cuerpu cuando ta cerca de la muerte, recursu que dexó cambiar al actor protagonista hasta once veces. Doctor Who nació como un programa educativu pa tresmitir a la mocedá la historia y la ciencia, anque la ciencia-ficción acabó comiendo les trames históriques. La serie forma parte de la cultura popular y ye reconocida como una serie de cultu y una de les meyores producciones televisives britániques. Ye tan conocida que la Oficina de Patentes dexó que la BBC rexistrara la imaxe de la caseta de la Policia de Londres al considerar que taba más asociada a la serie qu’a la mesma policía.

Doutor Who - 075 - Robot (1 de 4) [Galego] from TeleGaliza on Vimeo.

A últimos de los 80, les televisiones autonómiques emitieron los episodios protagonizaos pola cuarta reencarnación del doctor, anque actualmente TV3 ta emitiendo la conocida como «serie moderna», principiada nel 2005 depués del parón de la serie en 1989 y de la película fecha en 1996. Nestos momentos, pue vese a lo llargo de tol mundu, dende Australia y Brasil a Hong Kong, pasando per Malasia, EE. UU., Colombia y Corea del Sur. Bien que prestaría ver la serie moderna nel nuestru idioma...

Rosalía pop

Esti 24 de febreru cúmplese 178 años del nacimientu de Rosalía de Castro y Galicia celebra’l Día de Rosalía, una fecha ensin carácter institucional pero con multitú d’actos entamaos pola sociedá civil. Mesmamente, Google acaba de dedicar el so Doodle a la escritora, recoyendo amás unos versos en gallegu de l’autora, dalgo que muestra la conexón ente la escritora y les xentes del so país. Sicasí, pa llegar a esi puntu ye de reseñar la mitificación de la escritora que surdió depués de la so muerte. Una mitificación que dura tovía güei y que foi afalada dende’l principiu pola Real Academia Galega, que nesi momentu taba dirixida por Manuel Murguía, viudu de Rosalía. Asina pue entendese que’l pueblu gallegu llegara asumir un númberu importante de poemes y estrofes como versos comunitarios. Nel llau contrariu, hai pocos asturianos que –fuera de Cadavéu- sepan recitar dalguna estrofa del Padre Galo. Escueles, instituciones culturales, alministraciones y medios de comunicación tendrían muncho que dicir sobre esta realidá.