V.O.S. n'ast

Nel procesu de normalización del asturianu ta claro que la TPA tien que xugar un papel destacao, onde'l doblaxe de producción ayena al nuestru idioma tien que ser el pegollu fundamental. Sicasí, nun se pue dexar de llau la importancia del subtituláu. Dexando de llau los programes infantiles y xuveniles –amás de les películes de vaqueros y les telenoveles (productos de muncha audiencia y con unos espectadores que van fuxir del subtituláu)-, hai que reseñar qu’actualmente hai una parte mui importante de la población que nun espera a ver la so serie favorita doblada al castellanu; consúmela –o consumíala- con subtítulos al traviés de les páxines de descargues. Asina, una parte importante de la población ta avezada a esti formatu de traducción audiovisual. Otra manera, somos un país pequeño –polo que la futura industria del doblaxe ta condenada a ser pequeña- y con una sociedá ensin alfabetizar na so llingua. Por eso, el subtituláu al nuestru idioma podría ser una estratexa bona y normalizadora al que la televisión asturiana nun tendría que tener mieu. 

Ta claro que l’audiencia de TPA –xente mayor de zones de menos de 10.000 habitantes- nun consume la ficción ayena que la cadena emite -col permisu de les películes de vaqueiros de vaqueros que s'emiten pela tarde-. Estos productos namás consiguen salir de la marxinalidá en términos d’audiencia –superar el 2%- cuando tienen la novedá añadida de tar doblaos al nuestru idioma. Por eso, el subtituláu podría axuntar alredor de les pantalles a la xente que demanda productos n’asturianu, pero tamién a los partidarios d’esta traducción audiovisual y a toes aquelles persones interesaes en deprender vocabulariu –yá sía n’ingles o n’asturianu-. Amás de muncho más barato que’l doblaxe, el subtituláu ye la única manera que tien la ficción ayena de TPA pa diferenciase de los productos ufríos poles televisiones estatales -muncho más consolidaos y con promoción mayor- y la competencia de les descargues per Internet.