Nós tamién podríemos facer sitcoms

Una sitcom –o comedia de situación de tola vida- ye una teleserie protagonizada por un grupu de personaxes que dan vida a un guión humorísticu que se desendolca siempre nel mesmu espaciu, como pue ser la casa familiar o’l trabayu. La trama suel progresar en cada capítulu, anque los argumentos nun tienen continuidá temática. Les sitcoms más conocíes son d’EEUU, la meca del sector audiovisual, con series como Friends, The Fresh Prince of Bel-Air, Two and a Half Men o The Big Bang Theory. Sicasí, el formatu espardióse per mediu mundu. Por exemplu, nel Estáu español trunfen sitcoms como Aida o La que se avecina, mentes que les cadenes autonómiques nun son ayenes a esti procesu.

Precisamente, una de les sitcoms más exitoses ye la catalana Prats bruts (Platos puercos), una serie estrenada per TV3 en 1999 y que foi un éxitu d’audiencia mentes los tres años que tuvo n’antena –llegó a tener una media del 35% de share-. Mesmamente, la serie sigue reponiéndose cada branu con una aceptación bona del públicu catalán. Amás, llegó emitise en castellanu en Vía Digital y en gallegu en TVG, mentes que los vascos fixeron una adaptación pa ETB2.

Esta producción taba protagonizada por Joel Joan y Jordi Sànchez, que facíen de dos mozos que nun teníen nada que ver y que compartíen pisu en Barcelona. A David y López, nomes de los personaxes qu’interpretaben, sumábense amigos y compañeros de trabayu colos que compartíen les sos aventures pa tirar p’alantre día a día. Con un humor intelixente y esaxerao, la serie tamién destacaba pola parodia de la sociedá catalana y les referencies al catalanismu. Precisamente, nel capítulu que podéis ver equí, tenéis al actor Jordi Sànchez -enantes de convertise nel Recio/Rancio de La que se avecina- intentando sacar la catalanidá de Joel Joan pa convencelo de que nun emigre a Madrid.

Per otru llau, TVG acaba d’estrenar con abondo éxitu Luci, una serie que lleva’l nome de la so protagonista –papel interpretáu por Nuncy Valcárcel-, una muyer de 37 años que trabaya cuidando los xardines públicos d’A Coruña y qu’acaba de divorciase depués de que'l so maríu la dexara por otra más moza. Trátase d’una muyer normal colos sos quilos de más, la so hipoteca a mediu pagar, con un fíu que nun-y fai casu y una hermana cola que fala per teléfonu tolos díes. Esta sitcom tien un formatu de baxu costu, polo que ta rodada dafechu n’escenarios naturales, dalgo que-y da un protagonismu mui importante a la ciudá d’A Coruña y a una cuasi omnipresente Torre d’Hercules. 

Con too, el so curtiu presupuestu, el so rodaxe con dos cámares, l’apoyu mínimu d’iluminación artificial, los sos diálogos naturales y les sos histories cencielles dan-y un formatu cuasi documental qu’interesó a los mesmos americanos. Y ye que la una productora d'ellí acaba de comprar a TVG los derechos de la historia p’adaptala nos EEUU, convirtiéndose asina na tercer serie española en llegar a la meca del audiovisual, pero na primera sitcom en ser vendida a la patria d’orixe d’esti formatu -too ello depués d'emitise namás un capítulu-.

Tovía nun sabemos si nós llegaríemos ellí si tuviéremos una televisión –o unos directivos d’esa televisión- que supieren invertir en futuru y facer apueste pola ficción propia. Con too, esperiencies como Chatarrona –con 20.000 visites nuna selmana- indiquen bien que si nos dexaren tamién podríemos llegar lloñe y planta-y cara a príncipes, alcántaras, vélvet y demás…