Doble vara de midir

Sí, a mi tamién me prestaría qu’El Rostru Impenetrable llegara al 20% de share y tuviera más audiencia que’l Sálvame, pero ye que TPA nun llega nin al 5% de media d’audiencia y vienres y sábadu pela nueche nun suel llegar nin al 2%, polo que parez un datu bonísimu esi 5,1%, cuatro décimes perriba de la media del mes d’una cadena qu’últimamente namás ta perriba de La2. Y ye que los datos televisivos son asina, nun podemos midir l’éxitu d’un programa del mesmu xeitu en TPA, en Tele 5 o en ClanTV. Por exemplu, payares foi un mes mui malu pa Tele 5 con un 14% de share, pero un mes bonu pa LaSexta con un 6,3%. ¿Cómo se pue entender esto? Mui fácil: Tele5 ye la cadena que suel ser líder, pero en payares tuvo un 0,1% menos qu’Antena3 –polo que perdió la guerra pol lideralgu-. Mentes, LaSexta xubió tres décimes y asitióse per segundu mes perriba de Cuatro, la so principal competidora. 

Otru datu, nesti casu con anécdota del bable –pa que vos preste-, nel 2012, la retresmisión del Liet que fixo TPA foi un fracasu d’audiencia: el festival celebrábase n’Asturies con una promoción bien grande, pero anque’l Teatru de La Llaboral taba enlleno, la emisión en directo nun tuvo tanto tirón nel pase per televisión y quedó con namás 1,5% de share –cuasi un 3% menos que la media de la cadena nesi día-. Precisamente, el festival emitiérase pela primer vez dos años enantes al traviés d’A8, la canal segunda de TPA y con una promoción que nun llegó más allá de los núcleos militantes. Sicasí, foi too un éxitu: la retresmisión tuvo un 0,3%. ¿Cómo se pue entender esto? Pues ye que cuando s’emitió’l Liet per A8, esta canal tenía un 0,1% d’audiencia, colo que la so emisión consiguió triplicar la media de la canal, mentes que la emisión del 2012 per A7 –que compitió col derby madrilanu-, anque tuviera muncha más audiencia, baxó la media. Coses de la tele…

Más datos, TPA Noticias Mediodía ye’l mayor éxitu de TPA y nunca suel tar perbaxu del 20%. Bonísimu datu pa la cadena. Sí, pero en parte. Ye un bon datu porque a TPA cuesta-y llegar al 5%, pero nun ye un datu bonu si lo comparamos col 30% qu’algamaba Panorama Regional enantes del nacimientu de la canal asturiana o’l 30% que consiguen los informativos autonómicos de TV3 o TVG a la mesma hora. Un 20% ye un datu bonu d’audiencia pa una canal, pero un datu malu si se supón que TPA puxa por ser el principal referente informativu de los asturianos, como yera Panorama Regional o como ye’l Telenoticies o’l Telexornal pa catalanes y gallegos. Sicasí, n’Asturies el TPA Noticias tien tanta influencia social como Los Simpsons.

Agora hai quien nos quier verder que’l resultáu de la película n’asturianu ye malu. Home, comparáu col restu de canales ye malu, sí, pero pa TPA ye un datu mui bonu. Si nos quieren vender –si nos mesmos asumimos- que ye un datu malu y que nun merez la pena siguir cola emisión de películes n’asturianu entós ye que tampoco nun merez la pena siguir con Superasturianos, Date una vuelta, Conexión Asturias, El taxi de Maxi, El Faro o La Quintana de Pola, espacios que quedaron n’audiencia perbaxo d’El Rostru Impenetrable. Amás, hai que tener en cuenta’l día d’emisión de la película de Marlon Brando: nun día de baxa audiencia y ensin una promoción grande –hailos que lleeron la prensa del país y vieron que’l 27 d’avientu TPA emitía El Rostro Impenetrable como si fora otra película en castellanu ensin nenguna novedá más-. Si los directivos de la nuestra televisión esperaben un datu grande d’audiencia nun sé por qué nun la emitieron na nueche del 25 d’avientu o del 1 de xineru, díes de muncho consumu televisivu…

Quien diga que tar perriba de la media de la cadena ye un datu malu ta reconociendo que la existencia de TPA nun tien sentíu, porque la sociedá ta dándo-y el llombu. ¿Por qué una película n’asturianu tien que ser un exitazu y una en castellanu non? ¿Por qué esa doble vara de midir l’asturianu? ¿Si llegara a un 10% diben empezar a emitir una montonera de películes n’asturianu? Nun sé, pero Sones, Camín de Cantares, Día de Mercáu o Güelos nun baxen del 10% -dupliquen l’audiencia de TPA- y llevamos años estancaos nel 5% de programación nel nuestru idioma. El so éxitu nun supunxo que la directiva de TPA punxera en cuestión la existencia de programes en castellanu en TPA ¿Non? El Faro tien menos del 1% y ehí ta, baxando la media d’audiencia y ensin que naide cuestione por qué los directivos de TPA la siguen emitiendo, anque tuvieren meses enantes anunciándola como’l estrenu más importante de la temporada, dalgo que se pue comparar cola promoción que-y fixeron a El Rostru Impenetrable… Que nun nos engañen…

L'audiencia social: #ElRostruImpenetrable

La televisión convirtióse nún de les temes preferíes polos usuarios de redes sociales. Los espectadores, que siempre comentaren los programes a la mañana siguiente colos collacios, puen facelo agora  en tiempu real al traviés de Twitter. Ye la llamada audiencia social y, ente otres coses, sirve pa midir la fidelización de los programes. Hasta existe una companía dedicada al analís de l'audiencia social n'España: Tuitele, que publicó, con motivu del primer aniversariu del empiezu de la so actividá, un repasu de la so trayectoria y de l'actividá televisiva en Twitter; un tipu d'audiencia distinta a l'audimetría.
 

Audimetría y audiencia social nun miden lo mesmo; mentes que los audímetros miden la cantidá d'espectadores que tán viendo un programa, l'audiencia social analiza qué parte d'esa audiencia interactúa col programa al traviés de les redes sociales y qué opinión y emociones xenéra'l conteníu.  La midida y l'analís de l'audiencia social ufierta a cadenes y productores de televisión, axencies y anunciantes y polo xeneral a la industria de la televisión, una forma nueva d'analizar a l'audiencia de la televisión.

Fonte: Europa Press

La primer vez en gallegu

Los primeros personaxes de ficción que pudieron sentir los gallegos nel so idioma foron los de la telenovela brasileña A Escrava Isaura, que s’emitió pela primer vez el 25 de xunetu de 1985 a les 15.35. Esta producción de 100 capítulos, estrenada orixinalmente en 1976 en TV Globo, emitióse doblada y tuvo un éxitu que nun volvió repetise coles telenoveles posteriores, producíes en países de fala española -debe ser cosa de la idiosincrasia lusófona-. Nesi momentu, y al tener en cuenta que namás existíen dos canales de televisión más, l’impactu que produció la emisión foi bien grande: yera la primer vez que se podíen ver personaxes de ficción falando en gallegu.

Nesa xornada tamién s’emitió la serie d’acción Magnum, protagonizada por Tom Selleck –la producción volvió a reponese nel 2005 con un doblaxe nuevu d’alcuerdu colos cambios normativos de la RAG-. Sicasí, al igual que nel casu catalán, la serie que más repercusión tuvo foi Dallas. Y ye que l’audiencia yá taba avezada a ver a los protagonistes falando en castellanu, polo que resultó estraño que JR pasara a ser XR (xotaerre), dalgo que foi oxetu d’atención, opiniones y polémiques.

Pues ver los primeros minutos del doblaxe al gallegu equí.

Sue Ellen, yes un pingu

Esti vienres 27, a les 22.30, vamos vivir un fechu históricu: l’estrenu de la primer película doblada al asturianu pa la televisión. Trátase d’El rostru impenetrable (One-eyed Jacks), que dirixó y protagonizó Marlon Brando. Comentar qu’anque pienso qu’habría que tirar más peles producciones infantiles –les pelis de Harry Potter y Astérix n’asturianu tendríen que ser un clásicu de la programación de navidá de TPA- nun me parez desacertada del too la escoyeta de la película. Hai que tener en cuenta l’éxitu que tienen les cintes de vaqueros en TPA y nel restu d’autonómiques en llingua propia, cosa que nun pasa coles demás películes doblaes. Con too, como puntu negativu hai que falar del poco interés que ta mostrando’l Conventu por esta película, a pesar de que la emisión ye un fechu que va pasar a la historia de la nuestra televisión.

Un exemplu ye que cuando empezó a emitir TV3, el 10 de setiembre de 1983, programóse un mensaxe del President y hasta un partíu en directo del Barça. Sicasí, l’espaciu que pasó a la historia foi’l que s’emitió a les 16.20, momentu nel que los catalanes vieron pela primer vez a JR, protagonista de la serie Dallas, falando la so llingua. Los responsables de TV3 consiguieron facese cola temporada nueva de la serie gracies a que TVE decidiera dexar d’emitila. El so visionáu tuvo cargao de simbolismu: amás de formar parte de la programación inaugural, mostró’l compromisu de que la canal nun diba ser complementaria de la que se facía en castellanu, sinón que diba ser competitiva y homologable a cualquiera canal. Del mesmu mou, nesi capítulu pronuncióse la frase “¡Sue Ellen, ets un pendó!”, les primeres palabres malsonantes de la televisión en catalán, polo qu’esta llingua empezaba a ser utilizada na televisión n’otros rexistros, non namás pa falar de cultura, sinón que tamién reflexaba los rexistros populares. Asina, 30 años depués de que fora pronunciada na pantalla pequeña, la frase ye tovía güei un símbolu de la normalización llingüística del catalán.

Con too, en TPA tovía nin empezaron a promocionar el doblaxe de la primer película n’asturianu, cuando dalgo tan importante tendríen que llevar selmanes anunciándolo con un “próximamente” y, polo menos, tener falao d’ello nel TPA Noticias, sobre too teniendo en cuenta que nel llabor hai implicaes instituciones como l’Academia de la Llingua Asturiana. Y ye que pa la directiva de RTPA nun conciben la televisión de la mesma manera que los directivos que punxeron en marcha TV3: como una televisión que valío como preséu pa reconstruir l’autogobiernu, pa cohesionar l’autonomia, pa facer país... Nel llau contrariu, l’asturianu parez que ye pa Virgili y compañía un problema al qu’hai que responder porque la televisión emite dende Asturies, anque tamién lo podría facer dende Valladolid…

"Sálvame" versión folki

Falaba ayeri de Luar y de cómo tenía más audiencia en Galicia que Sálvame. Sicasí, eso nun quita pa que los gallegos tamién tean pendientes de polémiques y griesques televisives, anque en vez de falar de los cuernos de Rosa Benito o de les adicciones de La Esteban, les polémiques na TVG vienen pola manera d’entender la defensa de la tradición y identidá gallega. Asina, dientro del concursu “Vai de gaita”, que s’emite en Luar, un concursante participó con una gaita marcial o marciana,  híbridu ente la gaita gallega y la escocesa. Susana Seivane, miembru del xuráu y que vien d’una familia mui rellacionada col mundu de la gaita, llegó calificar l’instrumentu de “cáncer de la música gallega” y otorgó-y un cero a Denis Rodríguez, el concursante que participó con esti instrumentu. Otru de los miembros del xuráu, el tamién gaiteru Cristian Silva, acusó al concursante de facer circu y entregó-y un rollu de papel hixiénicu pa simbolizar la so “cagada”. La griesca, más qu’un desalcuentru ente puristes y defensores de la innovación, tien el so tresfondu políticu: la gaita marcial ye un inventu de Xosé Lois Foxo, director de la Real Banda de Gaitas de la Deputación de Ourense, venceyada históricamente al PP.

Que nun maten los “sones” d’Asturies

Los mis güelos, que son d’una aldeina d’A Estrada (Pontevedra), a eso de les diez de la nueche yá suelen tirar a durmir. Nun esperen más allá de lo qu’ellos tovía llamen “o parte”. Tolos díes menos ún, porque los vienres ye sagrao -como los domingos pa mi güela dir a misa- ver “ao Ghayoso na jallegha”. Entós nun se mueven de la siya hasta la 1 A.M, cuando “o Ghayoso” despide’l programa hasta la selmana que vien. L’espaciu del que vos falo nun ye otru que Luar, gala musical presentada por Xosé Ramón Gayoso en TVG y que nel país vecín pue hasta cola enésima reaparición de La Esteban en Sálvame. Luar emítese en directo y pel programa pasen tanto les estrelles del panorama estatal como les de la música gallega, sobre too de la tradicional. Asina, l’espaciu –que tamién dedica tiempu al humor y los concursos- pon enriba un escenariu y n’igualdá de condiciones a Isabel Pantoja y a una banda de gaites. 

Y ye que l’espítitu del programa ye llevar una romería a la televisión, polo que un vienres pola nueche los gallegos puen ver coses como que la cantante Marta Sánchez cante “Quen poidera namorala”, poema del escritor Celso Emilio Ferreiro; a una orquesta interpretando versos de Rosalía de Castro a ritmu de merengue; ver a Boney M convirtiendo'l "Daddy Cool" nun muncho más patriu "Move o cú"; sentir “A Rianxeira” a ritmu de rock, en versión d'El Consorcio o d'Isabel Pantoja -ye imposible actuar más de dos veces en Luar ensin cantala-; o, mesmamente, como podéis ver nel vidiu qu’abre la entrada-, a Sabela y Pili Pampín –versiones femenines y gallegues del nuestru Vicente Díaz- interpretando una versión na llingua propia de la banda sonora de Moulin Rouge. L’espaciu ye güei, depués de 1.000 programes y 21 años d’emisión, too un referente de la memoria colectiva de los gallegos.

N’Asturies tamién tenemos programes asemeyaos. Ehí ta Sones –anque, por desgracia, a lo más que llegaron, col permisu de Los Ciquitrinos, ye a facer versiones de cantares de Victor Manuel-. Con too, el programa musical de TPA ye ún d’esos –pocos- espacios que xustifiquen la existencia de la canal. Amás, la so emisión foi fundamental pa popularizar y dar a conocer les cares de los interpretes de canción asturiana –pa profesionalizar el xéneru-. Mesmamente, quién sabe lo qu’influyó esti programa pa que Patrimoniu decidiera iniciar los trámite pa declarar la tonada como BIC. Y ye que Sones tien ente un 10-15% d’audiencia tolos domingos, convirtiéndose nún de los programes más vistos d’una cadena que tien una media qu’anda ente’l 4-5%. 

Sicasí, hai una diferencia bien grande ente l’espaciu de la TVG y el de la TPA. Mentes la TVG mima Luar y tien a Xosé Ramón Gayoso como’l so presentador estrella, la nuestra televisión lleva selmanes ensin emitir l’espaciu de xeitu normal –una gala músical grabada nun teatru d’un conceyu asturianu-. Asina, TPA emitió ayeri la repetición de la gala que s’emitió’l Día d’Asturies pasáu, mentes que los domingos anteriores dedicóse a emitir recopilatorios de programes anteriores. Ye verdá que’l presupuestu de la TPA ye’l que ye y tamos yá a finales d’añu –anque primero malgastaren en Formula 1 y en paga-y series a TVG-, pero nun se pue entender esta situación: tamos falando d’un de los espacios de más audiencia de la canal, un emblema del mesmu. En nenguna cabeza entra que se dediquen a desgastalu a base de repeticiones. Nun m’imaxino qu’en Conexión Asturias se dedicaren a engañar a l’audiencia emitiendo monográficos con reportaxes vieyos. 

Pero claro, Conexión Asturias ye un programa en castellanu, producíu por una productora madrilana. Amás, tien un equipu de reporteros que van per tol país toda la región, hasta per sitios que güelen a cuchu, los mis probes... Ellos sí que faen serviciu públicu, non un programa cutre pa vieyos. Ye verdá que sí, tien audiencia, qu’a los asturianos-yos presta. Mesmamente, muncho más que’l Conexón Asturias, pero qu’esperes d’un pueblu que tovía, depués de sieglos d’intentos pa que xubieran al carru de la modernidá, tovía sigue usando’l bable… Modu sociata: on.

Atopa les diferencies

Emisión de TV3 de la Festa de les Lletres Catalanes, entamada pola asociación Òmnium Cultural.

Emisión de TVG de los Premios da Cultura Galega, entamaos pola Xunta de Galicia.

Emisión d'IB3 y Canal 33 (canal segunda de TV3) de los Premis 31 de Desembre, entamaos pola Obra Cultural Balear.

Emisión de TPA de los Premios Lliterarios n'asturianu, entamaos pol Gobiernu d'Asturies.