De llombu a la sociedá

Taba viendo mentes escribayaba estes palabres l’espaciu Especial Informatiu Consulta que se taba retresmitiendo per TV3. Y ye que dende qu’Artur Mas compareció a les 14.00 hores y anunció que la sociedá catalana diba poder decidir el so futuru nel 2014, la televisión pública d’esti país lleva emitiendo una programación especial. Asina, TVC ufrió la comparecencia conxunta del President y los partíos soberanistes, amás de les reacciones del restu de formaciones –tanto dende Barcelona como dende Madrid- y programó tertulies, debates y entrevistes centraes na noticia. Toos pudieron falar y la televisión pública recoyó toles reacciones, dende los que quieren la independencia hasta los que ven la consulta como una llocura que va dexar a Cataluña fuera de los organismos internacionales. Con esta programación especial, TV3 nun se posicionó a favor o en contra: ufrió tola información nun día que pue entrar dientro de los llibros d’historia. 

La televisión catalana lleva faciéndolo asina dende’l 2010, añu nel que’l Tribunal Constitucional recurtió un Estatut qu’avanzaba hacia’l federalismu, dalgo que supunxo’l puntu d’arranque del divorciu ente España y Cataluña. Asina, les canales de televisión catalanes yá dedicaron una cobertura especial a la manifestación independentista del 11 de setiembre del 2012, con una retresmisión conxunta per TV3 y 3/24 con conexones en directo, entrevistes y hasta un helicópteru qu’ufrió imáxenes aérees. Per otru llau, 8TV y RAC1 –propiedá del Grupo Godó (La Vanguardia)- tamién emitieron una programación especial.

Otra manera, un añu depués de la manifestación independentista, la canal catalana dedicó una programación especial pa cubrir la Vía Catalana, cadena humana d’unos 400 quilómetros promovida pola Asamblea Nacional Catalana y qu’axuntó al 20% de la sociedá civil. Meses enantes, el 29 de xunu d'anguaño, TV3 emitió dende’l Camp Nou’l Concert per la Llibertat, entamáu por Òmnium Cultural y nel que participaron 60 artistes qu’interpretaron cantares sobre la llibertá énte 70.000 espectadores. Del mesmu mou, TV3 utilizó los últimos avances tecnolóxicos pa retresmitir nel 2010 tolos actos de la visita de Benedictu XVI a Barcelona. Pol mesmu interés xeneral, el PSOE de Madrid lleva años pidiendo a l’autonómica madrilana que retresmita en directo la Marcha del Arguyu Gai, qu’axunta tamién a dos millones de persones nes cais de la capital d’España.

Y estes retresmisiones hai que veles más allá d’una determinada ideoloxía: tienen que ver col interés xeneral hacia la información sobre convocatories masives qu’abrieron los informativos de les televisiones de mediu mundu –menos el de TVE-. Precisamente, hai que tener en cuenta que'l procesu soberanista catalán nun lo empezó nin Artur Mas nin CiU. Mesmamente, nin líder nin partíu tuvieron una posición clara sobre’l derechu a decidir hasta 12 de setiembre del 2012, momentu nel que comprobaron que la manifestación fora un éxitu y que la sociedá catalana taba mayoritariamente a favor de la independencia. Y eso ye lo más importante d’esti procesu: la sociedá civil catalana foi la qu’encabezó la reivindicación y los partíos sumáronse al carru pa dar respuesta al glayíu de la cai –o pa tapar los recortes nel casu de CiU-.

Y nesi sentíu, TV3 supo tar al llau de la sociedá, pero non posicionándose: namás abrió les cámares y los micros a la realidá social. Nel llau contrariu ta TPA, que fiel al so amu tapez tola actividá cultural y reivindicativa del principal movimientu social del país: el movimientu de reivindicación llingüística. Yá sé qu’Asturies nun ye Catalunya. Nun digo que TPA emita tolos años en directo la mani pola oficialidá, tampoco nun digo que la televisión pública dedique una programación espacial pa cubrir el Conciertu pola Oficialidá. Nun soi tan grandón. Pero tampoco nun me parez normal que la manifestación —a la qu’acuden unes 5.000 persones— y la Xunta Estraordinaria de l’Academia de la Llingua ocupen un minutu al final del informativu, el mesmu tratamientu que si fora un certame gastronómicu. Tampoco nun ye normal que TPA nun informe sobre’l XXV Conciertu pola Oficialidá hasta un día depués de que se celebre y que los responsables del informativu consideren más destacable una “caravana del amor” en Piloña o la primer misa del Obispu Auxiliar, a la qu’acudieron 200 persones —al Conciertu foron 1.500—. Nin tanto nin tan poco. 

Sí sería normal qu’en Conexión Asturias y nel informativu hubiera conexones en directo y qu’ocupara un sitiu preferente una manifestación qu’axunta cada añu a miles d’asturianos –nin dicir yá la retresmisión del actu de l’ALLA, que yá va pa dos años que nun s’emite nin de madrugada-. Del mesmu mou, sería de lo más normal que RPA emitiera en directo o diferío el Conciertu pola Oficialidá –o una parte d’él-. La situación estraña tovía más cuando na televisión aragonesa sí hai debates o reportaxes sobre la situación de la so llingua -que tien 10.000 falantes y un movimientu de reivindicación a años lluz del nuestru—. Mesmamente, Aragón TV emitió reportaxes que mostraben que l'aragonés tovía se tresmite como llingua materna. Sicasí, TPA actúa de llombu a la realidá llingüística del país y parez que quier mostrar que nun hai más sociedá civil que la qu’entra dientro del Teatru Campoamor nos Premios Principe -nin más debate que nel que participen les fuercies parllamentaries, con permisu de la FADE-. 

Per otru llau, TV3 va retresmitir güei a les 20.00 hores la 63 Nit de Santa Llúcia, la fiesta de les lletres catalanes qu’entama cada añu Òmnium Cultural, onde se van dar a conocer dellos premios de lliteratura. A la mesma hora, el Paraninfu de la Universidád’Uviéu va acoyer l’actu d’entrega de los Premios Lliterarios n’asturianu del Gobiernu d’Asturies, los premios más importantes de les nuestres lletres. ¿Mandará TPA una cámara y un redactor pa informar del actu? ¿Va facer lo mesmo pa cubrir l’actu d’entrega de los Premios Andrés Solar, qu'entrega dientro d’una selmana la Xunta pola Defensa de la Llingua Asturiana? Parez ser que la conseyera de Cultura -nun me parez que tenga Educación nenguna- nun va tar presente na entrega de los Premios Lliterarios y RTPA nun va ser menos. ¿Veremos nel TPA Noticias de güei como la conseyera inaugura l'ampliación d'una galería mentes silencien la entrega de los premios más importantes n'asturianu? 

Una televisión autonómica tien que valir como mediu de tresmisión d’información y conteníos, y, al empar, como instrumentu d’integración social, de refuerciu identitariu y de normalización llingüística, amás de buscar sinerxes promoviendo la integración de les fuercies sociales, dende la iniciativa popular a la de carácter más institucional. Lo contrario ye condenala a desaparecer énte la indiferencia de la sociedá. Ehí tal casu de Canal 9 –y de TeleMadrid que va pel mesmu camín-. La televisión valenciana convirtióse nuna ferramienta mediática al serviciu del PP, dalgo que fixo que la sociedá diéra-y el llombu y llegara a un ruín 4% d’audiencia –la mesma audiencia que tien agora mesmo TPA-. Nesi momentu, ensin capacidá d’influencia social, el PP decidió que yá nun-y valía pa nada y acabó de manera fulminante cola emisión. Sicasí, foi la sociedá civil y el valencianismu/catalanismu’l que llevantó la voz y s’echó a la cai pa defender la so televisión, porque anque llevara una década dándo-y el llombu yera la única que falaba la so llingua, que taba ehí retresmitiendo les fiestes, visibilizando y vertebrando’l territoriu y contando histories de ficción con tastu propiu. 

Sicasí, ¿qué pasara si mañana daquién decide pesllar una televisión que vive de llombu a la sociedá énte la que tien que responder y que marxina la llingua, la cultura y les manifestaciones populares qu’entama la sociedá civil?