Símbolos, cámara y acción.

El 20 de setiembre del 2012, nueve díes depués d'una multitudinaria manifestación independentista y hores depués d'un alcuentru ente Mariano Rajoy y Artur Mas, esti últimu yera recibíu por cientos de persones na plaza de Sant Jaume de Barcelona. Los asistentes mostraron asina'l so apoyu al President depués del non de Rajoy a un pactu fiscal. Ehí tamién taben, ente otros, Muriel Casals, presidenta d'Òmnium Cultural (dalgo asemeyao a la Xunta pola Defensa de la Llingua catalana); Salvador Giner, presidente del Institutu d'Estudios Catalanes (l'Academia de la Llingua local); Salvador Cardús, sociólogu; Issona Pasola, directora del documental Cataluña-Espanya y productora de Pa negre (actualmente presidenta de l'Academia del Cine Catalán); Ferran Requejo, catedráticu de ciencies polítiques de la Pompeu Fabra; Ventura Pons, ún de los directores de cine de más proyección internacional de Cataluña; Vicent Sanchis, periodista y vicepresidente d'Òmnium; Salvador Cardús, prestixosu intelectual catalanista; y Jaume Sobrequés, director del Centre d'Història Contemporània de Catalunya. Depués de saludar a toos, Mas posicionóse ente Sobrequés y Casals pa que los fotógrafos sacaren la semeya. Too ello ente glayíos d'independencia que namás foron interrumpíos pola interpretación a coru del himnu catalán. Depués de que la manifestación del 11 de setiembre demostrara que l'independentismu consiguiera'l control social del catalanismu, l'actu de Sant Jaume mostró una allianza (patriótica) ente'l poder políticu y los intelectuales. Yera'l símbolu del frañamientu d'un pactu con España: Les senyeres (la bandera oficial) daben paso a l'estelada (la independentista). Sicasí, l'actu tamién mostró l'éxitu de les polítiques culturales de (re)construcción nacional que punxera en marcha Jordi Pujol. 

Esti 19 de xunu, el Fueru d'Avilés -del sieglu XII y primer testu xurídicu n'asturianu- salió pela primer vez del Archivu Municipal pa esponese na cupula del Niemeyer -símbolu del fracasu de la política cultural asturiana-. El motivu nun yera un simposiu o congresu internacional sobre'l mesmu nin una esposición sobre'l nuestru milenariu idioma. Yera pa dalgo tan ayeno al patriotismu como una esposición sobre los cien años del puertu d'Avilés. L'asistencia de Mariví Monteserín, alcaldesa de la ciudá, y otres autoridaes locales -nenguna de l'alministración autonómica- dio al actu un tastu tovía más localista. Hai que reseñar que tamos falando d'un manuscritu que trespasa lo local pa convertise en tou un símbolu de la identidá asturiana -el primer testu xurídicu nel nuestru idioma y el primeru n'asturianu del nuestru territoriu (al dexar de llau Nodicia de Kesos)-. L'únicu puntu patrióticu púnxolo l'archivera d'Avilés, Covadonga Cienfuegos, qu'afirmó ente los medios qu'un de los rasgos más importantes del testu ye que taba escritu en llingua romance, “nuna mestura d'asturianu y provenzal”.



Depués de que'l fin del Franquismu n'Asturies nun supunxera la puesta en marcha d'una política de recuperación cultural, güei hai una parte mui importante de los asturianos -tamién de los avilesinos- que desconocen esti testu y, sobre manera, que desconocen que ta escrito nel nuestru idioma. Mesmamente, cualquiera pue ser redactor de la televisión pública ensin tener unos mínimos conocimientos sobre la llingua y la historia d'esti país, como se pudo ver esti 19 de xunu na primer edición del informativu de TPA. Y ye que dende la canal publica informaron de que'l Fueru taba escritu en “lengua provenzal”, ensin nenguna referencia a la importancia que tien el testu pa tolos asturianos. La inorancia informando nuna televisión que tendría que formar a la sociedá, que desconoz el so pasáu gracies al llabor del sistema educativu y los medios de comunicación. Y un país que desconoz el so patrimoniu, el so pasáu, ye un país mudu. Ye un país ensin futuru: ye un país que nun quier ser país.

Los fechos podríen mostrar el trunfo de les polítiques culturales del PSOE n'Asturies. Sicasí, y por mor de les reacciones que se vivieron nes redes sociales, na segunda edición del informativu'l presentador de TPA Noticias presentó'l mesmu reportaxe -anque agora ensin lo de “lengua provenzal”- afirmando que'l Fueru d'Avilés yera “toda una joya de la lengua asturiana”.

Nun somos Cataluña, non. Equí nun tuviemos a Pujol, tocónos Villa. Con too, güei tovía nun puen publicar la esquela que pon puntu final a una identidá con más de mil años d'historia. Nun van secuestranos el nuestru pasáu y nun van dexanos ensin futuru. Siguimos vivos y negámonos a dexar d'existir.

Una vergoña

 Actuación emitida'l 8 de mayu pasáu, Día de les Lletres Asturianes.

El 6 de marzu de 1982 constituyóse la Xunta Xeneral provisional. L'Estatutu d'Autonomía entrara en valir el 30 de xineru y la Diputación d'Uviéu tenía qu'integrase dientro de l'alministración nueva. Foi escoyíu presidente de la mesma Agustín José Antuña Alonso, d'UCD, y vicepresidente Eugenio Carbajal Martínes, de la FSA. Nesi momentu, TVE-Asturies fixo la retresmisión en directo más llarga de tolos centros rexonales del Estáu, con cinco hores de debate nun día. 

Dende esa fecha, los asturianos pudieron ver toles sesiones de constitución del so Parllamentu, amás de los debates d'orientación política anuales, al traviés de TVE-Asturies, qu'emitía estos actos en desconexón per La 2. Dende 2005, estes retresmisiones, como ye lóxico, pasaron a emitise pela televisión pública asturiana (TPA). Mesmamente, dende hai dalgunos años, la canal segunda (A8) emite en directo tolos plenos de la Xunta Xeneral.

Güei ta constituyéndose'l Parllamentu más plural de la historia de la nuestra autonomía y col asturianu formando parte pela primer vez de la sesión gracies al diputáu de Podemos Héctor Piernavieja Cachero, miembru de la mesa d'edá -que tamien vieno con camisetes d'oficialidá-. La TPA -que cuenta con tres canales (A7, A8 y A9HD)- ta emitiendo repeticiones -repeticiones de repeticiones n'A8 y carta d'axuste n'A9-. Una vergoña pa les nuestres instituciones, pa la nuestra autonomía audiovisual, pa la nuestra democracia. 

Una vergoña y un insultu pa tolos asturianos. Ye dalgo impensable en cualquier país del mundu con instituciones y televisión propies. Espero que'l restu de partíos denuncien el fechu y que pidan responsabilidaes, lo contraría mostraría la falta d'interés pola autonomía, pol audiovisual, pola democracia y polos asturianos.

Xugar (y concienciar) col poder de la televisión

Un documental falsu ye un xéneru de cine y televisión que suel incluise dientro de la comedia, anque existen casos de falsos documentales dramáticos. El falsu documental preséntase como una grabación de la vida real, anque se produz como una obra de ficción. L'orixe d'esti xéneru tenémoslo na adaptación radiofónica de la novela La guerra de los mundos, que fixo pa la CBS en 1938 Orson Welles. Ún de los últimos exemplos ye Operación Palace, documental falsu producíu pola cadena de televisión La Sexta y dirixíu por Jordi Évole.

Otru casu mui conocíu ye Alternativa 3, un programa de televisión tresmitíu nel Reinu Uníu en 1977. L'espaciu aparenta ser una investigación periodística alrodiu de desapariciones estrañes de científicos británicos que de casualidá terminen afayando un plan pa construir bases secretes nel espaciu pa escapar d'una inminente catástrofe climática na Tierra. Tratóse d'una broma, pero tovía güei muncha xente piensa que ye real porque en dalgunes televisiones, como la española, emitióse ensin confirmar que yera una broma.

Precisamente, nel casu de TVE, podemos falar de Camaleó, que ye'l nome que más se rellaciona cola falsa cobertura informativa que'l circuitu catalán de La 2 fixo sobre la ficticia muerte de Gorbachov a primeros d'abril de 1991. L'espaciu vio recurtiada la so programación habitual pa la emisión d'un especial de L'Informatiu nel que s'anunciaba l'asesinatu del padre de la Perestroika. L'impactu de la noticia provocó'l colapsu de la centralina de la cadena, que contó col apoyu mediáticu de Radiu 4 (RNE), que se fixo ecu de la noticia y nun la desmintió hasta quince minutos depués.

Otra manera, de 1994 ye Ensin alvertencia, una película d'EEUU fecha pola cadena CBS. L'espaciu emitióse'l 31 de ochobre de 1994, en Halloween, y presentóse como si fora un casu real de noticia de última hora onde anuncien que tres meteoros cayeron nos Estaos uníos, Francia y China. De primeres parez dalgo natural pero depués, los cientificos empiecen a dase cuenta de que podría ser una señal que nos manden d'otru mundu. Hubo xente que mentes la emisión púnxose en contactu con otres cadenes de tv pa preguntar por qué nun se taba informando de lo que dicía la CBS.

Tamién ye mui famosu Operación Lluna, un documental del 2002 emitíu pela canal francesa Arte qu’especulaba cola posibilidá de que la llegada del home a la Lluna nel Apolo 11 fora un engañu encargáu pol entós presidente Richard Nixon y que les imaxes del fechu foren rodaes nun estudiu por Stanley Kubrick, que daquella estrenara 2001, Una Odisea nel Espaciu.

Otra manera, una de les bromes televisives que más repercusión tuvo foi la que fixo la televisión valona, RTBF, que nel 2006 punxo a Europa n’alerta cuando interrumpió la so programación con un parte especial qu’anunció que’l Parllamentu de Flandes acababa de votar la so independencia. Depués de media hora d’emisión y de la petición de la ministra de Comunicación de la Comunidá Francófona, RTBF decidió poner un rótulu en pantalla qu’esclarió que se trataba d’una ficción. Con too, la central telefónica de la cadena yá colapsara y la mayoría d’embaxades en Bruxeles llamaran a les capitales.

Chirstopher Lee (1922-2015)

Pa mi, que medré engancháu al Alucine de los sábados pela nueche en La 2 y a les pelis de la Hammer, dicir Drácula yera pensar n'él. Güei la cultura audiovisual de la humanidá ye más probe. Muncho mieu me fixisti pasar, maestru de la medrana. Ta siempre.

#CaleyaSésamu en Corvera