Un fechu históricu

El 6 de mayu de 1937, el dirixible alemán LZ 129 Hindernburg empezó arder cuando aterrizaba en Nueva Jersey. L’accidente produció la muerte de 36 persones y supunxo la fin de los dirixibles como mediu de tresporte. Les imáxenes del accidente dieron la vuelta al mundu y tuvieron una repercusión mediática bien importante. Precisamente, la narración radiofónica que fixo pa la NBC Herbert Morrison dende’l llugar de los fechos convirtióse na primer retresmisión d’un eventu d’actualidá. La descripción del accidente y la so reacción –cuando empezó arder glayó Oh, the humanity!- pasaron a la posteridá como un clásicu de la historia sonora del mundu. Esa retresmisión foi la primera, pero depués otros fechos destacaos de la historia de la humanidá foron narraos en directo, como la caída de la Muria de Berlín o los atentaos del 11-S, por poner dalgunos exemplos.

Esti 2 de xunu a les 13 hores, cuasi 70 años depués d’esa narración, RPA emitía, como lleva faciendo dende hai selmanes, un informativu n’asturianu. L’espaciu tuvo marcáu pola noticia qu’enllenó tolos minutos informativos de los medios de comunicación del Estáu español: l’abdicación del rei Xuan Carlos I. Sicasí, esi nun ye’l fechu históricu del que quiero falar. Y ye qu’unos cuatro minutos depués del so empiezu, el periodista Naciu Varillas dio pasu en directo –y n’asturianu- a la señal institucional de RTVE, qu’ufría nesi momentu pa tolos medios de comunicación el mensaxe del rei. La casualidá fixo que’l 2 de xunu, pela primer vez, s’informara d’un fechu históricu en directo y nel nuestru idioma.

Al igual que facíen Radio Galega, Euskadi Irratia o Catalunya Radio, los asturianos pudimos sentir como cambiaben les coses –o, simplemente, les cares- en directo y  nel nuestru idioma. Con too, nel nuestru casu namás foi una casualidá bien prestosa, pero ehí queda.