Coincidiendo col añu xacobéu de 1999, TVG estrenó Os vixilantes do camino. Trátase d’una película y d’una serie de 13 capítulos –en realidá la película ye un montaxe de los cuatro primeros episodios- protagonizada pola estrella de la programación infantil en gallegu: Xabarín. Nella, Xabarín y los sos collacios tienen que lluchar contra’l malváu Dabondo, que quier acabar con tolos monumentos qu’hai a lo llargo del Camín de Santiagu infectándolos col mal de la piedra y, asina, poder reconstruilos de forma virtual en Dabondópole, una especie de parque temáticu. Foi
la primer serie d’animación fecha pola TVG y tuvo que realizase nuna
empresa madrilana al nun existir en Galicia productores que pudieren
encarar esti trabayu.
La serie, enllena de chisgos a la cultura pop pa llegar tamién a una audiencia más adulto, presenta en clave d’humor una crítica a les corporaciones multinacionales y una promoción de la conservación del patrimoniu. Amás, el celtismu enllena tol so argumentu. Asina, nesta producción aparecen As tecnoreteiras, una mestura de grupu de pandereteres y yakuza xaponesa que visten un hibridu de traxe tradicional gallegu y quimonu; mentes que munchos de los capítulos céntrense nel viaxe de los vixilantes per dalgún llugar d’Europa, ente ellos ta la visita a un festival celta en Bretaña pa buscar una gaita máxica que-yos va permitir dominar les fuercies de la naturaleza.
No hay comentarios.:
Publicar un comentario