¿Consejo Asturiano de la Cultura o Conseyu de la Cultura Asturiana?

Esperanza. Esa ye la palabra que define les declaraciones que voi sintiendo del conseyeru d'Educación y Cultura nuevu, Xenero Alonso. La última esti mesmu 17 de setiembre na Xunta Xeneral, onde afirmó que diba potenciar l'enseñu del asturianu, tamién n'Infantil y na formación d'adultos, y el so usu en RTPA con programes “que dean una visión normalizada del asturianu” -palabres que la televisión pública acaba de censurar-. Mesmamente, faló de la coordinación entre conseyeríes -Cultura y Industria- p'afalar la industria audiovisual, del apoyu de la RTPA a esa industria y d'utilizar les cases de cultura pa que la ciudadanía pueda ver la obra de los cineastes asturianos. Cada vez soi más fan de Xenaro. Tien un proyectu de país, quier llevalo alantre y ye dalgo a lo que nun tamos avezaos, por desgracia. Con too, nun me presta nada que falare de la creación d'un Consejo Asturiano de la Cultura y de l'aprobación d'un plan estratéxicu de la cultura n'Asturies. Les midíes son necesaries y yá lleguen con décades de retrasu. Sicasí, les palabres tienen muncho conteníu dientro.

¿Nun ye una marca de complexu identitariu siguir diferenciando ente cultura asturiana y cultura n'Asturies. ¿Qué ye cultura asturiana? ¿Gaita y tonada? ¿Y cultura n'Asturies? ¿El Niemeyer y la Ópera d'Uviéu? ¿Y si se fai una ópera n'asturianu nel Niemeyer pal Día de les Lletres? ¿Y si un grupu de la Cuenca fai ska xamaicanu n'asturianu? ¿Cultura n'Asturies, cultura universal? Parez qu'hai cultura de primera y una cultura de segunda. La diglosia sigue presente.

Podemos mirar al otru llau del Eo, onde existe un Consello da Cultura Galega. Trátase d'un organismu asesor y consultivu creáu al nacer l'autonomía y que tien potestá pa la defensa y promoción de los valores culturales del pueblu gallegu. Ta formáu por representantes d'entidaes culturales, como la mesma Real Academia Galega, y personalidaes destacaes de la cultura d'esti país -nomes fundamentales como Ramón Piñeiro o Carlos Casares pasaron pela dirección del centru-. Anque ye una institución pública, tien plena independencia pa defender y reflexonar sobre'l papel de la cultura nel futuru de Galicia, con especial atención a la llingua y cultura propia, pero tamién a la cultura universal. Nestos 35 años d'autonomía, el Consello convirtióse nuna institución fundamental pa la cultura gallega y nuna ferramienta pa construir país. Ta por ver si equí van crear un Consejo Asturiano de Cultura como'l que pue haber en Madrid o Segovia o van entamar una institución fundamental pal futuru del país, porque Asturies, como país, tamién necesita una institución asina; un Conseyu de la Cultura Asturiana.

Símbolos, cámara y acción