#RTVVnoestanca

Una televisión autonómica ayuda a vertebrar el territoriu, normalizar la llingua propia y promocionar les tradiciones y fiestes. Amás, xenera empléu, porque ye una inversión que permite que cientos de persones trabayen nel sector audiovisual –un sector definíu como estratéxicu pola Unión Europea-. Por eso, nun tien sentíu confrontar los hospitales y les escueles col serviciu qu’ufre una televisión pública como Canal 9, sobre too cuando hubo un gobiernu que pasó años –por nun dicir décades- malgastando’l presupuestu y hinchando la plantilla con trabayadores afines pa convertir la televisión de tolos valencianos nun mediu al serviciu de los intereses del PP. Precisamente, los trabayadores comprometíos cola so profesión son los que van dir a la cai, mentes qu’a los qu'entraron a deu y col carnet del partíu van paga-yos los favores y van siguir trabayando en conseyeríes y empreses publiques varies.

Los que llevaron a Canal 9 a esta situación –endeudada y con un 4% d’audiencia-, son agora los que manden cerrala pol supuestu bien de tolos ciudadanos. La sociedá valenciana y los trabayadores de Canal 9 énte una decisión unillaterar que se fixo ensin contar con ellos, cuando ellos y namás ellos son los dueños de la televisión pública, porque Canal 9 nun ye del gobiernu. Nun ye d’esi gobiernu que fixo obres millonaries y ensin sentíu, que mantién aeropuertos a los que nun lleguen aviones y que ta imputáu en casos de corrupción. Esi gobiernu que dexa a la sociedá valenciana ensin la so televisión como yá los dexó ensin TV3: déxalos ensin nenguna canal na so llingua propia.

Ye verdá que Canal 9 yera una televisión al serviciu del PP, que yera la canal del Tómbola y que’l compromisu cola cultura propia yera tímido, pero tamién yera la televisión de Babalà, l’espaciu infantil col que medraron delles xeneraciones de valencianos; la canal qu’emitió El show de Joan Monleon, un concursu mui friki con tolos tópicos valencianos y que trunfó nos primeros años de Canal 9; L’alqueria blanca, la serie de producción propia qu’axuntaba cada domingu al 20% de los valencianos; o, mesmamente, la que falaba del tiempu que diba facer nel País Valencianu. Y ye que nun hai elementu televisivu qu’ayude más a vertebrar un territoriu que’l mapa del tiempu.

Nun valen escueses. Nun ye cuestión d’hospitales o televisión. Ye una estratexa de recentralización: un país ensin televisión ye un país ensin mirada propia, ensin voz. Ye un país silente. El que cierra la televisión del pueblu ta atacando al pueblu, ta atacando’l so autogobiernu. Nel País Valencianu y equí, n’Asturies.