El martes 2 de xunu del 2009, el programa musical de Radio Galega Aberto por Reformas empezaba como cada día cola mesma sintonía y el mesmu nome. Sicasí, depués de tres años d’emisión, tenía un presentador distintu: Xusto López Carril nel sitiu de Xurxo Souto, l’ex líder de la banda de rock Os Diplomaticos do Monte Alto. Nun yera namás una voz distinta, el cambiu tamién simplicada una filosofía nueva que se fixo evidente col primer cantar que sonó, de Bruce Sprinsteen. Hasta esi día, la música en gallegu de creación contemporánea fora la que-y diera identidá al espaciu, dalgo que convirtiera a Aberto por Reformas nun escaparate de la música fecha nel idioma del país vecín y nuna ponte ente grupos y públicu. La situación, amás d’un golpetazu pa la escena musical gallega, yera una muestra del cambiu políticu en Galicia, depués de que’l bipartitu PSOE-BNG perdiera les elecciones y de que’l PP de Núñez Feijóo volviera al poder. La llegada de Feijóo a la Xunta supunxo la destitución de Xurxo Souto como director de programación de Radio Galega, polo que tuvo que dexar de presentar el so programa, l’únicu dedicáu a la música actual nel idioma autóctonu. Too ello a pesar de que la llei de creación de CRTVG dexa claro’l papel del mediu na promoción del idioma y de la cultura gallega.
Con too, anque la política llingüística de Feijóo llegó a sacar a la cai a miles de gallegos en defensa del so idioma, la emisora sigue faciendo un apueste pola música de sellu propiu, sobre too si ye tradicional y nun tien una lletra que remueva conciencies. Asina, amás de Radio Galega, la empresa pública del país vecín cuenta con Radio Galega Música y Son Galicia Radio. La primera ye una radiofórmula musical, pero onde tamién entren programes de divulgación como’l clásicu Lume na palleira, dedicáu a la música folk, o Astrolabio, centráu nes fusiones de la música tradicional cola actual. Otra manera, Son Galicia Radio, qu’emite namás al traviés d’Internet y TDT, programa música en gallegu, tanto tradicional como contemporánea. Amás d’esto, Radio Galega vien convocando xunto al Derrame Rock dende’l 2011 –desque’l festival abandonó Pravia y empezó a celebrase n’Ourense-, el concursu Novo Son. Nesti certame, que tien un premiu del xuráu y ún del públicu otorgáu polos oyentes de Radio Galega, puen participar grupos con composiciones orixinales interpretaes en gallegu. Los ganadores del premiu del xuráu consiguen actuar nel Derrame Rock, mentes que los del públicu van facelo nun programa de la TVG.
Per otru llau, Gaztea ye una de les dos emisores musicales del Grupu EITB, l’Ente de Comunicación vascu. La cadena, qu’emite dafechu na llingua propia d’esti territoriu, ta dirixida al públicu más mozu gracies a un formatu de radiofórmula que colos sos 140.000 oyentes supera a Los 40 Principales y foi fundamental pa dar a conocer la música rock y pop fecha en vascu. La cadena tamién convoca’l concursu Gaztea Maketa, abiertu a tolos grupos y solistes d’Euskal Herria y onde’l ganador del premiu del xuráu recibe 2.000 euros y material musical valoráu en 3.000 euros, amás d’actuar nel festival Bilbao BBK Live. Otra manera, el ganador del premiu del públicu algama 2.000 euros. La otra emisora del grupu ye EITB Musika, empobinada a un públicu mozu pero más adultu, con una programación en vascu basada na música y na cultura, cola retresmisión de conferencies, debates, programes sobre los festivales musicales del país y conciertos en directo. Mesmamente, l’Ente vascu dedica una programación especial a cubrir la Feria del Llibru y el Discu Vascu de Durango, la cita más importante del añu cola cultura en llingua vasca. Los actos musicales reciben una atención especial al traviés de les retresmisiones de Gaztea y EITB Musika.
En Cataluña, los medios públicos tamién faen un apueste importante pola promoción de la música propia. Asina, la emisora Catalunya Música tien una política de siguimientu y apoyu a toles manifestaciones musicales del país, amás del intercambiu internacional gracies a un alcuerdu de colaboración cola Unión Europea de Radiofusión, dalgo que permite que les producciones musicales catalanes tengan presencia acullá del ámbitu llingüísticu. Amás, tamién existe iCat fm, una emisora dedicada a la cultura tradicional y que basa una parte importante de la so programación na radiofórmula de música actual en cualquier xéneru y idioma, anque tien un 30% de cantares en catalán. La cadena, amás de la so programación per radio analóxica, ta disponible al traviés d’Internet, onde tamién se puen sentir les canales TotCat, dedicáu a la música en catalán; MusiCatles, de música del mundu; Mediterràdio, de música de los países bañaos por esti mar; iCatjazz, especializáu en jazz; y iCatTrònica, de música electrónica. Otra manera, Ràdio 4 de RNE dedica unes 15 hores diaries a la música nesti idioma, mentes que la llei lingüística de 1998 establez que toles emisores qu’emiten dende Cataluña tienen que radiar un mínimu del 25% de los cantares en catalán o aranés. L’articuláu surdió depués d’una campaña llamada Volem cançons en català a la ràdio i la televisió! a favor de l’aplicación d’esti porcentaxe.
Per otru llau, dende hai años, iCat fm, TV3, el Gobiernu catalán y la revista Enderrock convoquen Sona 9, qu’actualmente yá ye’l concursu de maquetes más importante de los Países Catalanes. El certame articúlase al traviés d’un programa col mesmu nome que s’emite n’iCat fm y que tien como puntu final una gala que se retresmite per TV3. Los ganadores de les distintes categoríes -pop-rock, cantar d’autor y folk- reciben como premiu la grabación d’un discu y un videoclip, amás d’una campaña de promoción y una xira de conciertos peles principales ciudaes y festivales de Cataluña. Otra manera, amás de l’atención al traviés d’iCat fm, tamién Catalunya Ràdio –la emisora con más oyentes del país- ocúpase d’actos onde la música moderna en catalán ye la protagonista. Yá en 1991, emitió en directo dende’l barcelonés Palau Sant Jordi un conciertu conxuntu de los grupos de rock en catalán Sopa de Cabra, Sau, Sangtraït y Els Pets. L’actu contó cola asistencia de 22.000 persones y supunxo la consagración social de la música fecha na llingua de Ramon Llull. Dos décades depués, nel 2013, la cadena tamién emitió en directo’l Concert per la Llibertat, actu entamáu pola asociación Òmnium Cultural y onde participaron 60 artistes qu’interpretaron cantares sobre la llibertá énte los más de 70.000 espectadores qu’enllenaron el Camp Nou.
Nel llau contrariu de Galicia, País Vascu y Cataluña ta Asturies. El nuestru país cuenta con una emisora de radio pública dende’l 8 de setiembre del 2006. Precisamente, lo primero que se pudo sentir na RPA foi’l tema musical “Xirandiyes”, una adaptación del grupu Felpeyu de tres dances asturianes cola que se quixo facer un homenaxe a los desaparecíos Carlos Redondo y Igor Medio, mentes que’l primer espaciu emitíu foi Abriendo camín, que llegó xusto un mes depués y onde Carlos Rubiera presentó un programa d’autor sobre la historia de la música del país. Nes primeres emisiones, la llingua y la música asturiana xugaron un papel bien importante al traviés d’espacios como Música, músiques, que contaba con protagonistes de la canción asturiana y que dirixía Ismael González Arias; o Rockmería, presentáu pol líder de Dixebra, Xune Elipe, onde se podía sentir rock n'asturianu y n’otres llingües del mundu.
Sicasí, a pesar de les visibles bones intenciones de los primeros meses, l’asturianu y la so música foron perdiendo espacios hasta llegar a la situación de güei, onde la RPA nun produz nengún programa n’asturianu y, muncho menos, dalgún dedicáu a la promoción de los músicos qu’utilicen esti idioma como ferramienta de comunicación. Actualmente, los únicos requexos que dexa la cadena pública a la música del país son la redifusión al traviés de les ondes de los espacios de TPA Sones, con actuaciones de música tradicional, y El club musical, centráu nes composiciones contemporánees. Con too, nel 2013, la emisora dedicó pela primer vez una programación especial a la gala del VII Premiu al Meyor Cantar. Asina, emitió’l concursu en diferío y programa dos especiales sobre’l gallardón presentaos por Xune Elipe, anque la iniciativa foi un casu aisláu que nun tuvo continuidá na emisión. Otra manera, lloñe de lo que pasa nel restu de comunidaes con llingua propia, la concesión de llicencies de radio privada nun favoreciu’l nacimientu d’emisores feches al 100% dende’l país y el Gobiernu d’Asturies vien faciendo un apueste poles cadenes estatales, onde la música y la llingua asturiana nun tienen güecu. Nun se pue dexar de mencionar l’acosu y derribu que les distintes alministraciones vienen exerciendo sobre Radio Sele, la única emisora n’asturianu y que dedica más del 80% de la programación a la difusión de la nuestra música.
Con too, esta situación podría cambiar si l’audiencia ye a apoyar y apuntalar los requexos que los medios públicos asturianos dexen a la nuestra música. El primer pasu ye mostrar que la música asturiana tien un públicu y l’éxitu d’artistes como Dixebra, Los Berrones, Vicente Díaz o Anabel Santiago ye un exemplu. Tamién sería fundamental que los mesmos músicos exercieran presión sobre l’alministración pa revertir la situación y pasar d’un tratu discriminatoriu a una discriminación positiva. Un exemplu ye Cataluña, onde la música en catalán yá vive una situación de cuasi normalidá. Asina, nel 2006, l’Associació de Cantants i Intèrprets Professionals en Llengua Catalana (ACIC) anunció la so disolución depués de 18 años de trabayu. Según la entidá, la mayoría d’oxetivos taben cubiertos y yá existía una presencia normal de la llingua catalana na música, pero’l camín nun fora fácil. Por exemplu, a finales de los 80, dellos miembros d’esta asociación –ente ellos Lluis Llach, referente musical y intelectual de tres xeneraciones de catalanes-, llegaron a encerrase nes dependencies de la Conseyería de Cultura de la Generalitat en protesta pol tratu discriminatoriu que recibíen nos medios de comunicación públicos. Depués d’esto, empezó a andase’l camín y vieno el boom del Rock Català, la retresmisión de conciertos en directo per TV3, la llei llingüística qu’obliga a un 25% de música en catalán nes radios privaes, el nacimientu d’iCat fm y la normalidá de la escena musical catalana. Pero hubo qu’empezar a andar el camín…
Publicáu orixinalmente nel Anuariu de la Música Asturiana 2013
No hay comentarios.:
Publicar un comentario