Twin Peaks foi una serie de televisión norteamericana de primeros de los noventa creada por David Lynch y Mark Frost. Esta producción fala d’un axente del FBI que llega a Twin Peaks, una población pequeña de los EEUU pa investigar l’asesinatu de Laura Palmer, la moza más popular del institutu de la localidá. Cola ayuda del sheriff del pueblu, l'axente empieza a entrugar a los habitantes y va afayando adulces que munchos d’ellos escuenden secretos escuros y misteriosos. Señalada como una producción que marcó un enantes y un depués na televisión, munches ficciones posteriores tomaron como modelu esta serie norteamericana. Mesmamente, dalgunes en llingües minoritaries.
Un exemplu ye Balbemendi, una serie estrenada nel 2008 n’ETB1 y que s’alloñó de les anteriores producciones de ficción en vascu al dexar de llau l’humor y el costumismu. Esta serie de misteriu, onde les tradiciones y la mitoloxía xueguen un papel esencial, fala de la desaparición d'una pareya nel Parque Natural de Balbemendi y d’una muyer que llega al llugar pa saber qué foi de la so hermana, desaparecida tamién na zona fai una década. Faciéndose pasar por fotógrafa, va conociendo a los habitantes del pueblu y va metiéndose nes sos vides pa consiguir información. Al traviés d'ella, l’espectador va afayando los misterios que tien Balbemendi y los sos habitantes.
Otra manera, TVG estrena esti domingu 5 d'ochobre Serramoura, un thriller rural ambientáu nun llugar de la Galicia interior que vive de la esplotación de los sos recursos madereros y nel que dos families, los Soutelo y los Fiuza, lluchen pol control del negociu. L’escenariu vese alteriáu al aparecer brutalmente asesinada una de les sos vecines. Pa resolver el casu, la Guardia Civil manda a un sarxentu especializáu n'homicidios, que va tener que trabayar con una axente de la localidá. Según van dir avanzando na so investigación, van salir a la lluz, episodiu a episodiu, los secretos, miseries y conflictos d'esta villa gallega. La serie, una apueste grande de TVG, ta llamada a convertise nun éxitu y n’otru pasu alantre na ficción gallega depués de Matalobos.
Al asturianu y a la TPA tovía-y queden munchos pasos que dar pa llegar a esti nivel, pero tien un bon formientu na nuestra lliteratura.
No hay comentarios.:
Publicar un comentario