Según indica nel so twitter la empresa xixonesa Distribuciones Cimadevilla, yá ta disponible’l primer llibru n’asturianu de Los Bolechas; Cómo Ñacemos. Trátase del primer volume de la Biblioteca Básica de Los Bolechas, compuesta por 12 exemplares y que recueye l’espíritu de la serie pero con un enfotu didácticu y pedagóxicu. Asina, los llibros son nuna ferramienta tanto pa pas como pa maestros qu’ayuda a formar a los neños en valores universales y nos vezos seguros y saludables –polo ye que un preséu pa los escolinos d’educación infantil y primaria-. Los llibros tamién tienen recursos sonoros de fácil accesu dende dispositivos móviles, tablets, smartphome y ordenadores.
Otra manera, según informa TVG, el 1 de xineru del 2015, la televisión pública portuguesa va estrenar el primeru de los 52 capítulos –dos temporaes- d’Os Bochechas que mercó. Y ye qu’asina son conocíos los personaxes nel país vecín, onde yá se publicaron dellos llibros. Nel país lusu camudó una migayina’l nome de la familia porque un expresidente portugués, Mario Soares, ye conocíu popularmente como O Bolechas. Col nome nuevu d’Os Bochechas quixeron evitar otres interpretaciones. La serie va emitise diaramente y al traviés de la canal internacional va llegar a otros países de fala portuguesa, como Angola, Cabu Verde, Guinea-Bissau, Mozambique y Santo Tomé e Príncipe.
Con too, lo más importante de la información de TVG, que yá produció cinco temporaes de la serie, ye que recuerden que “la comunidá vecina d’Asturies” foi’l primer sitiu onde s’emitió Los Bolechas “y la so emisión foi too un éxitu al algamar cuotes d’audiencia enxamás algamaes por un programa infantil”. Y lo más importante, la canal gallega afirma que TPA anunció una temporada segunda depués de rematar la primera. Pel momentu, nada sabemos d’eso, pero parez que les negociaciones tán ehí. Vida llarga a Los Bolechas asturfalantes.
No hay comentarios.:
Publicar un comentario