Falaba hai díes equí d’Os contos do camino, prestosísima y reconocida producción d’animación gallega. Esta serie ta producida por QDQ, una editorial especializada en llibros infantiles que dio’l saltu al audiovisual gracies a la collaboración de la Secretaria de Política Llingüística de la Xunta y el so programa pa dinamizar la llingua gallega ente los neños de 0 a 6 años. Asina, amás de Los cuentos del camín, QDQ adaptó a la televisión otres dos series de llibros públicaos por esta editorial. Por eso, bien fácil sería un alcuerdu ente TPA-Política Llingüística pa mercar y emitir n’asturianu estes tres producciones.
Cascoxos
Dirixida a un públicu d'ente 2 y 4 años d'edá y con capítulos de seis minutos de duración, básase nes hestories de los álbumes d’Armando Quintero y André Letria. Cascoxos muestra’l mundu de les rellaciones de los neños dende la perspectiva de dellos animales de xardín.
Cocorico
La primer temporada tien 26 capítulos de 13 minutos y ta destinada a neños d'ente 3 y 9 años. Narra la vida cotidiana d'un pitín curiosu y, sobremanera, aventureru, que tien qu’aprender, con ayuda d’amigos y mayores, a encarar los peligros de la vida esterior. Ta basada nos personaxes del álbum de Marisa Núñez y Helga Bansch.
No hay comentarios.:
Publicar un comentario